علمای کرامو، چاپیریالي فعالینو او د سکتوري ادارو مسؤلینو خپل نظريات او وړانديزونه د چاپېریال ساتنې ملي ادارې مشرتابه ته وړاندي کړه

۱۴۴۶کال د شوال۱۱مه/ بامیان
په بامیان ولایت کې علمای کرامو، چاپېریالي فعالینو، د بېلابېلو سکتوري ادارو مسؤلینو او علمي شخصیتونو د یوې غونډې په ترڅ کې خپل نظريات، وړاندیزونه او غوښتني د چاپېریال ساتنې ملي ادارې مشرتابه ته وړاندې کړې.
دا غونډه چې د چاپېریال ساتنې ملي ادارې د عمومي رئیس مولوي مطیع الحق خالص په مشرۍ ترسره شوه پکي د بامیان والي مولوي عبدالله سرحدي هم برخه اخیستې وه.

د بامیان والي په خپلو خبرو کې چاپېریال ساتنه یوه شرعي، ملي او انساني وجیبه وبلله او ویې ویل: "که موږ غواړو پاک، روغ او سالم ژوند ولرو، نو باید چاپېریال ته پاملرنه وکړو، نیالګي کښېنو، او له طبیعي منابعو څخه سالمه استفاده وکړو." نوموړي همداراز د علمای کرامو، استادانو، او ټولنیزو فعالینو رول د عامه پوهاوي په برخه کې مهم وباله او د هر اړخیز ملاتړ ډاډ یې ورکړ.
د چاپېریال ساتنې ملي ادارې عمومي رئيس غونډي ته په خبرو کې وویل د ټولنې د مختلفو قشرونو نظریات د چاپېریال ساتنې د پالیسیو او برنامو په پیاوړتیا کې مهم رول لري. نوموړي ډاډ ورکړ چې اداره به د یادو نظریاتو پر بنسټ خپلې برنامې نورې هم اغېزمنې او عملي کړي.

ښاغلي خالص وویل بامیان د افغانستان له تاریخي او لرغونو ولایتونو څخه شمېرل کېږي، چې دا زموږ د ګرانه هېواد لپاره ستر ویاړ او افتخار دی.
نوموړي څرګنده کړه بامیان د چاپېریالي او ایکولوژیکي پلوه ځانګړی ارزښت او ځانګړتیاوې لري، چې همدغه ځانګړتیاوې ددې لامل شوې څو دا ولایت د ساتنې وړ وګڼل شي. له دغو سیمو څخه د افغانستان لومړی ملي پارک (بند امیر)، د بامیان فلاتو ساتل شوې سیمه او د شاه فولادي طبیعي منظرې یادولای شو.

ښاغلي خالص زیاته کړه په بامیان کې پر نورو څو سیمو هم تخنیکي او ایکولوژیکي مطالعات دوام لري، ترڅو په راتلونکي کې د ساتنې تر چتر لاندې راشي. همدا ځانګړتیاوې بامیان د افغانستان د ایکوتوریزم او ګرځندوی مهمه نقطه ګرځولې ده.
د چاپېریال ساتنې ملي ادارې عمومي رئیس وویل اداره مکلفه ده چې چاپېریالي اصول په سمه توګه پلی کړي او ژمنتیا دا ده چې د بامیان ولایت طبیعي سرچینې په درست ډول وساتل شي.

په غونډه کې ګډونوالو د چاپېریال د اوسني وضعیت، د اقلیمي بدلونونو منفي اغېزو، د طبیعي منابعو د مدیریت، او اړتیاوو په اړه خپل نظرونه، وړاندیزونه او اندېښنې شریکې کړې.
د غونډي په وروستیو کې د بامیان ولایت چاپېریالي فعالینو د چاپېریال ساتنې ملي ادارې د عمومي رئیس هڅي او خدمتونه د مننلیک په ورکولو سره وستایلې او هغه ته يې په راتلونکي کې د لازیاتو بریاوو او پرمختګونو هیله وکړه.

Apr 10, 2025