وروستی
د چاپېریال ساتنې ملي ادارې عمومي رئیس د یو پلاوي په مشرۍ په "نوسکي نړیوال کانګرس" کې د ګډون په موخه روسیې هېواد ته په سفر لاړ
١٤٤٦کال د ذوالقعدې٢٢مه/ کابل
د افغانستان د چاپېریال ساتنې ملي ادارې عمومي رئیس مولوي
مطیع الحق خالص د ذوالقعدې٢٢مه نېټه د روسیې فدراسیون په رسمي بلنه د "نوسکي یوولسم
نړیوال چاپېریالي کانګرس" کې د ګډون په موخه دغه هېواد ته روان شو.
ښاغلي خالص وویل له ياد شوي سفر څخه یې موخه په دغه کانګرس
کې چې د ۲۰۲۵
کال د مې له ٢٢مې تر ٢٣مې پورې د روسیې په ستر صنعتي او تاریخي ښار، سنپترزبورګ کې
ترسره کیږي ګډون او هلته د افغانستان استازیتوب کول دي.
نوموړي زياته کړه دا کانګرس یو له مهمو نړیوالو چاپېریالي
غونډو څخه شمېرل کېږي، چې د نړۍ له شاوخوا ۴۰ هېوادونو څخه لوړپوړي دولتي او حکومتي استازي،
نړیوال سازمانونه، څېړنیزې او علمي موسسې، د اقلیم، چاپېریال او پایدار پرمختګ
متخصصین، غیر دولتي بنسټونه، ځوانان، رسنۍ او د خصوصي سکتور غړي پکې ګډون کوي.
ښاغلي خالص څرګنده کړه د کانګرس موخه دا ده چې د چاپېریال
او اقلیم بدلون په برخو کې نړیوال بحثونه وده ومومي او ګډې حللارې، همکاریزې ستراتیژۍ
او مسؤولانه اقدامات ترسره شي، څو د انساني ټولنې، طبیعي منابعو او اقتصادي پراختیا
ترمنځ توازن رامنځته شي.
ده وویل موږ به په دې کانګرس کې د هېواد د چاپېریالي وضعیت،
اقلیمي ننګونو او شته ستونزو په اړه نړیوال ګډونوالو ته معلومات وړاندې کړو او د
دوامدارې وچکالۍ، د اوبو د منابعو کمښت، د ځنګلونو له منځه تلو، د طبیعي سرچینو
تخریب، د خاورو او هوا ککړتیا، او د اقلیم بدلون له امله د راټوکېدلو تهدیدونو په
تړاو به د افغانستان غوښتنې او ننګونې تر نړیوالو ورسوو.
عمومي رئیس زیاته کړه تمه لري چې له نورو هېوادونو او نړیوالو
سازمانونو سره د همکارۍ، تجربې شریکولو او تخنیکي مرستو زمینه برابره شي او همدارنګه
دا کانګرس یوه تاریخي موقع ده چې موږ و کولای شو د افغانستان چاپېریالي وضعیت له نړیوالو
سره شریک کړو او د ګډو همکاریو له لارې د حل لارې او فرصتونه ولټوو."
د یادونې وړ ده چې دا لومړی ځل دی د افغانستان حکومت پلاوی
په دې کانګرس کې ګډون کوي او ورته بلل کیږي.