وروستی
د چاپېریال ساتنې ملي ادارې عمومي رئیس د یو پلاوي په مشرۍ قرغیزستان هېواد ته په رسمي سفر روان شو
۱۴۴۶کال د ذوالحجې ۶مه/ کابل
د افغانستان اسلامي امارت د چاپېریال ساتنې ملي ادارې عمومي
رئیس مولوي مطیع الحق خالص د یو پلاوي په مشرۍ نن سهشنبه د ۱۴۴۶ د ذوالحجې په ۶نېټه د واورین پړانګ د ساتنې
لپاره د رهبرۍ کمیټې په نهمه سیمهییزه غونډه
(GSLEP) کې د ګډون په پار قرغیزستان هېواد ته په رسمي
سفر روان شو.
قرغیزستان هېواد ته د تګ پرمهال د چاپېریال ساتنې ملي ادارې
عمومي رئیس ښاغلي خالص وویل د اسلامي امارت د بیا ځلې واکمنیدو را وروسته دا لومړی
ځل دی چې د افغانستان اسلامي امارت پلاوی په یاده سمیه يیزه غونډه کې ګډون کوي.
نوموړي زیاته کړه ياده غونډه چې د ۲۰۲۵ کال د جون په ۵ او ۶ مه نېټه په قرغیزستان هېواد
کې جوړېږي د هغو دولسو هېوادونو چې د واورین پړانګ طبيعي استوګنځایونه لري، لوړپوړي
چارواکي، مسلکي کارپوهان او استازي ګډون کوي.
د ده په خبره د غونډې موخه د واورین پړانګ د ساتنې ملي
پلانونو ارزونه، د نړیوالو همکاریو پراخول، د اقلیم بدلون، ناقانونه ښکار او د
وحشي ژوو د استوګنځایونو له منځه تلو پر وړاندې ګډې ستراتیژۍ جوړول دي. دا غونډه د
واورین پړانګ د ساتنې په برخه کې د سیمهییزو او نړیوالو همکاريو د پیاوړتیا لپاره
یو مهم ګام او فرصت دی.
دا چې افغانستان د وارین پړانګ د اوسیدو یوه مهمه سیمه ده،
نو د افغانستان د پلاوي ګډون به په دغه غونډه کې ډېر مهم او ارزښتناک وي او د
افغانستان پلاوی به د بدخشان او نورستان په غرنیو سیمو کې د واورین پړانګ د ساتنې
لپاره د ملي هڅو په اړه معلومات وړاندې کړي او همدارنګه هغه ستونزې او ننګونې چې
په یاده برخه کې موجودې دي له اړونده هېوادونو سره شریکې کړي.