وروستی
د هوا ککړتیا د مخنیوي عالي کمیسیون دویمه غونډه وکړه
د چاپېریال ساتنې ملي ادارې عمومي رئیس، شاه زمان میوندي په مشرۍ، د هوا ککړتیا د مخنیوي عالي کمیسیون د لړم میاشتې په ۱۹مه نېټه، د دې ادارې د بند امیر د غونډو په تالار کې دویمه غونډه وکړه چې پکې د چاپېریال ساتنې ملي ادارې مسلکي معین انجینر عزت الله صدیقي او اړوندو وزارتونو معینانو او استازو ګډون کړی وو.
د غونډې په پیل کې، ښاغلي میوندي د ګډونوالو هرکلی وکړ او د اجنډا مطابق یې رسماً غونډه پیل کړه ورپسې مسلکي معین د هوا ککړتیا د راکمولو او مخنیوي پنځه کلن پلان د تطبیق په اړه ګډونوالو ته د دې ادارې د کړنو په تړاو معلومات ورکړل او و یې ویل: د دې پلان د پلي کېدو ترڅنګ د عامه پوهاوي پلان هم چمتو شوی او تصویب شوی دی.
ښاغلي صدیقي د مطبوعاتي کنفرانسونو جوړول، د هوا د څرنګوالي څخه د نظارتي طرحې جوړول، د حمامونو او د خښتو بټیو له مالکینو او کابل ښار د ناحیو له معاونینو سره د ناستې ترسره کول او د اړوندو ادارو استازو سره د نیالګیو کېنولو په اړه غونډې کول د دې پلان له پرمختګونو څخه یاد کړل.
نوموړي له هغو وزارتونو چې د دې پلان په تطبیق کې سهیم دي غوښتنه وکړه چې خپل راپورونه دې کره ارقامو سره د چاپېریال ساتنې ملي ادارې ته را واستوي؛ تر څو موږ د لېندۍ میاشتې په پای کې جمهوري ریاست ته راپور ورکړو.
د اجنډا مطابق د کابل ښاروالۍ د چاپېریالي روغتیا ساتنې رئیس انجنیر حسن غلامي په کابل ښار کې د هوا ککړتیا راکمولو پنځه کلن پلان په پلي کولو کې د ښاروالۍ د کړنو په اړه معلومات ورکړل.
د ټرانسپورټ وزارت استازي د نقلیه وسایطو د تخنیکي معاینې لپاره د جوړې شوې طرحې په اړه معلومات ورکړل او ویې ویل چې که لازمه بودیجه ترلاسه کړي؛ نو دغه طرحه به په راتلونکي کال کې په کابل او ولایتونو کې پلي کړي. همدا راز د کانونو او پټرولیم وزارت استازي له ښار څخه لېرې د ریګرېشنونو د انتقال په اړه معلومات ورکړل.
د غونډې په پای کې د چاپېریال ساتنې ملي ادارې، د کانونو او پټرولیم وزارت او سټندرد ملي ادارې استازو په ګډون، یوه کمېټه جوړه شوه او دنده ورکړل شوه چې د ډبرو سکرو د تصفیه کول د څرنګوالي په اړه دې راپور چمتو او د کمیسیون غړو ته دې وړاندې کړي.
همدا راز د هوا ککړتیا د راکمولو او مخنیوي پنځه کلن پلان د لا ښه پلي کېدو په موخه ځېنې نور موضوعات هم مطرح شول او له هر اړخیز بحث وروسته لازمې پرېکړې وشوې.