وروستی
د چاپېریال ساتنې ملي ادارې عمومي رئیس د سویس د بشري مرستو دفتر له رئیس او ورسره پلاوي سره وکتل
١٤٤٦کال د ذی الحجې ٢٦مه/ کابل
د چاپېریال ساتنې ملي ادارې عمومي رئیس مولوي مطیعالحق خالص په داسي حال کې چې ددې
ادارې اړوند رئیسانو هم حضور درلود، د سویس د بشري مرستو دفتر له رئیس ښاغلي اریک
مارکلي او ورسره پلاوي سره د خپل کار په دفتر کې لیدنه وکړه.
په دې لیدنه کې دواړو لوریو د اقلیمي بدلون، روانو بشري او چاپېریالي پروژو او د
راتلونکو همکاریزو پلانونو په اړه هر اړخیز بحث او خبري وکړې.
د چاپېریال ساتنې ملي ادارې عمومي رئیس مولوي مطیعالحق خالص د اقلیمي بدلون له
امله د افغانستان له بېلابېلو سیمو سره مخامخ خطرونو ته اشاره وکړه او د چاپېریال
د خوندیتوب، د طبیعي آفتونو د مخنیوي او د سازګارۍ د پیاوړتیا په موخه یې د نړیوالو
مرستندویه ادارو رول مهم وباله.
نوموړي زیاته کړه چې د اقلیمي بحرانونو پر وړاندې باید هممهاله اقدامات وشي، او
دا د حکومتي ادارو د هڅو ترڅنګ د نړیوالو شریکانو همکاري غواړي.
ښاغلي خالص د ظرفیت لوړولو، عامه پوهاوي پروګرامونو او تخنیکي تجهیزاتو د برابرولو
په برخه کې د سویس دفتر د همکارۍ او مرستي غوښتنه وکړه.
د سویس د بشري مرستو دفتر رئیس ښاغلي اریک مارکلي د افغانستان د اقلیمي وضعیت په
هکله خپلې اندېښنې څرګندې کړې او د چاپېریال ساتنې ملي ادارې له هڅو یې ستاینه وکړه.
نوموړي وویل، هېواد یې چمتو دی چې د اقلیمي بدلون د اغېزو کمولو، د ټولنو د ملاتړ
او د پایدارو حللارو موندلو په برخه کې له افغانستان سره همکاري نوره هم پراخه کړي.
په ناسته کې دواړو خواوو د روانو پروژو پر تطبیق، د تخنیکي ظرفیت لوړونې، د طبیعي
سرچینو د مدیریت او د اقلیمي بدلون د خطرونو د ارزونې پر ګډو پلانونو هم بحث وکړ.
د لیدنې په پای کې دواړو لوریو ژمنه وکړه چې د اقلیمي بدلون پر وړاندې د اغېزمنو
او پایدارو اقداماتو لپاره به خپل تخنیکي ټیمونه په دندو وګماري ترڅو وکولی شي په
راتلونکي کې د اړتیا سره سم اقدامات ترسره کړي.