وروستی
په ښوونیزو بنسټونو کې زده کوونکو ته د چاپېریال ساتنې په اړه د عامه پوهاوي پروګرامونه ترسره شول
١٤٤٧کال د محرم الحرام ٣مه/ کابل، لغمان او کونړ
د افغانستان په بېلابېلو ولایتونو (کابل، کونړ او لغمان) کې
د چاپېریال ساتنې ریاستونو له لوري د ښوونځیو زده کوونکو لپاره د عامه پوهاوي پروګرامونه
ترسره شول. دغه پروګرامونه چې د اسعد آباد مرکز او نور القران دیني مدرسو ١٥٠ تنه،
د چراغ هدایت عالي ليسې (کابل) او مهترلام ښار د اورانوس ښوونیز مرکز کې ترسره
شول، هدف یې د اقلیمي بدلونونو، ککړتیاوو، د طبیعي منابعو ارزښت، د وحشي ژویو او
شنو ساحو ساتنې، او د شاګردانو مسؤلیتونو په اړه زده کوونکو ته عامه پوهاوی ورکول
وو.
په یادو پروګرامونو کې مسؤلینو له زده کوونکو سره هر اړخیز
معلومات شریک کړل او د هغوی ژمنې یې واورېدې چې د پاک او سالم چاپېریال لپاره به
خپلو مسؤلیتونو ته پاملرنه کوي. همداراز، په کونړ کې هغو زده کوونکو ته چې له ریاست
سره یې همکاري درلوده، چاپېریالي شعار لرونکي کتابچې، قلمونه، نښانونه او تبلیغاتي
مواد هم ووېشل شول.
د ښوونځیو اداري کارکوونکو او زده کوونکو د دغو پروګرامونو
هرکلی وکړ او د دوام غوښتنه یې وکړه. مسؤلینو ژمنه وکړه چې دا ډول برنامې به نورو ښوونځیو ته هم وغځول شي.