وروستی
ولایتونو کې د هر ډول فعالیتونو د څرنګوالي څخه په دوامداره توګه څارنه کیږي
۱۴۴۷ کال د محرم ۴مه
د ککړتیا راکمولو او چاپېریالي اصولو د تطبیق په پار د چاپېریال
ساتنې ملي ادارې د کابل، فاریاب، بامیانو، لغمان پکتیکا، خوست، زابل، غزني او غور
ولایتونو د چاپېریال ساتنې ریاستونو مفتشینو له لوري د مخلتفو اصنافو د فعالیتونو
د څرنګوالي او چاپېریالي وضعیت څارنه وشوه.
- د کابل ولایت د چاپېریال ساتنې ریاست مفتشینو لخوا د ۲۱مختلفو اصنافو: هوټلونو،
حمامونو، قصابیو، کلینیکونو، فاضلابو د انتقال شرکتونو او تجارتي مارکیټونو د سپتیک
څاه ګانو څخه نظارت ترسره شو.
- فاریاب کې د غږیزې ککړتیا د مخنیوي په موخه د چاپېریال ساتنې
ریاست او ترافیکو په ګډه همکارۍ له یو شمېر موټرونو او موټرسایکلونو څخه زړه بوږنوونکي
سلنسرونه او لیزري څراغونه خلاص او ضبط کړل، ډریورانو ته سپارښتنې وشوې که د بیاځلي
نظارت په لړ کې ونیول شول له قانوني چلند سره به مخ شي.
- بامیانو کې د آهک ډبرو د استخراج معدن د چاپېریالي او ټولنیزو
اغېزو ارزونه او د چاپېریالي وضعیت څارنه ترسره شوه او مسوولینو ته یې د چاپېریالي
اصولو د تطبیق لازمې سپارښتنې وشوې.
- لغمان کې د یخ جوړولو یو شمېر تولیدي کارخونو د فعالیتونو د
څرنګوالي او چاپېریالي وضعیت څارنه وشوه او مسوولینو ته یې د اوبو د اسراف او ککړتیا
د مخنیوي سپارښتنې وشوې.
- پکتیکا
کې د ځمکې لاندې اوبو د ککړتیا د مخنیوي په موخه د چاپېریال ساتنې ریاست مفتشینو
له لوري د امارتي ادارو د غیر معیاري سپتیک څاهګانو څخه نظارت ترسره شو او د معیاري
کېدو سپارښتنې ورته وشې چې ټولو یې د جوړیدو ژمنې وکړې.
- د خوست ولایت د چاپېریال ساتنې ریاست مسوولینو له لوري د
متون لین قصابیو څارنه وشوه او د فردي او چاپېریالي حفظ الصحې د ساتنې په موخه
قصابانو ته لازمې سپارښتنې وشوې.
- غزني، زابل او غور کې د یو شمېر رستورانتونو، موټر شویانو،
حمامونو او کلچه پزیو د فعالیتونو څخه نظارت ترسره شو او مسوولینو ته یې د چاپېریال
قانون او مقرراتو په هکله پوهاوی او لازمې سپارښتنې وشوې.
چاپېریال ساتنه د هر هېوادوال فردي مسوولیت دی، هر هغه څوک
چې د چاپېریال اصولو څخه سرغړونه وکړي د قانون منګولو
ته به وسپارل شي.