وروستی
د زرغون اقلیم مالي صندوق (GCF) د پالیسۍ په تړاو غونډه وشوه
د چاپېریال ساتنې ملي ادارې عمومي رئیس، شاه زمان میوندي په مشرۍ د روان کال د لیندۍ په ۴مه نېټه د دې ادارې مسلکي معین انجنیر عزت الله صدیقي په حضور کې د زرغون اقلیم مالي صندوق (GCF) د پالیسۍ په تړاو د دې ادارې د بند امیر د غونډو په تالار کې لومړنی بحث ترسره شو چې پکې د اړوندو وزارتونو معینانو، رئیسانو او آمرینو ګډون کړی وو.
د دې ناستې موخه د زرغون اقلیم مالي صندوق (GCF) څخه د کوچنیو مرستو ترلاسه کولو لپاره د پروپوزلونو چمتو کول و.
د غونډې په پیل کې ښاغلي میوندي د ملګرو ملتونو پر کارکوونکو هغه برید وغانده چې پکې زموږ یو شمېر هیوادوال او د ملګرو ملتونو کارکوونکي مړه او ټپیان شول.
د چاپیریال ساتنې ملي ادارې عمومي رئیس وویل: د افغانستان دولت مکلف دی چې د ملي پروژو مختلف سکټورونه چې د اقلیمي بدلون څخه اغېزمن دي، طرحې او کانسېپټ نوټونه یې د زرغون اقلیم مالي صندوق (GCF) څخه د مرستو ترلاسه کولو په موخه چمتو کړي. ده زیاته کړه: د (GCF) صندوق پرمختللي هېوادونه مکلف دي چې هر کال ۱۰۰ میلیارده ډالر کم ودې هېوادونه ته ورکړي؛ په همدې پار موږ په خپل ملي ټاکلي راپور کې د ۱۷ میلیارده ډالرو غوښتنه کړې؛ ترڅو د دغه میکانیزم له لارې یې ترلاسه کړو؛ نو په همدې خاطر د دولتي ادارو او همکارو موسسو له استازو غواړو چې خپلې طرحې او نظرونه په دې غونډه کې شریک کړي چې په اساس یې د اقلیمي بدلون اړونده ملي پروژې په ګډه چمتو کړو.
ورپسې د چاپېریال ساتنې ملي ادارې مسلکي معین انجنیر عزت الله صدیقي د GCF صندوق په اړه معلومات وړاندې کړل او ویې ویل: یاد صندوق په 2019 کال کې جوړ شوی چې کم ودې هېوادونه کولای شي په مالي ملاتړ یې د اقلیمي بدلون اړونده پروژې پلي کړي.
ښاغلي صدیقي له اقلیمي بدلون سره د سازښت او شین کوریزه ګازونو د راکمولو په تړاو د دولتي ادارو، خصوصي سکتور او مدني ټولنې په ګډه همکارۍ ټینګار وکړ او له هغوی څخه یې وغوښتل چې د اقليمي بدلون پروژو د پلي کولو لپاره دې خپلې طرحې د چاپېریال ساتنې ملي ادارې ته را واستوي.
د غونډې ګډونوالو د پروژو چمتوکولو د څرنګوالي، د کره ارقامو د نه شتون او زیان لیدونکو سکتورنو ته د لومړیتوب ورکولو په اړه خپلې پوښتنې او نظرونه د پنل له غړو سره شریک کړل.
د پنل په غونډه کې د چاپېریال ساتنې ملي ادارې مسلکي معین انجنیر عزت الله صدیقي سربېره د کرنې وزارت معین محب الله ننګ، د اقتصاد وزارت د ټولنیزو خدمتونو رئیس توریالي طنین او د اوبو او انرژۍ وزارت د پالیسۍ رئیسې ملالۍ بارکزۍ د ګډونوالو پوښتنو ته ځوابونه او معلومات ورکړل.
ښاغلي صدیقي د GCF د چمتووالي پروژې مسوولینو ته په چارو کې د دقت او ګړندیتوب په تړاو لازمې لارښوونې وکړې.
د غونډې په پای کې GCF readiness پروژې د اړیکو مسوول بلال اکبري ګډونوالو ته د زرغون اقلیم مالي صندوق په تړاو هر اړخیز معلوماتي پرېزېنټېشن وړاندې کړ