د چاپېریال ساتنې ملي ادارې عمومي رئیس د جاپان له سفیر سره وکتل

۱۴۴۶کال د جمادي الاول ۱۹مه/ کابل
د چاپېریال ساتنې ملي ادارې عمومي رئیس مولوي مطیع الحق خالص نن دوشنبه د ۱۴۰۴کال د لړم میاشتې په ۱۹مه نېټه  د جاپان له سفیر ښاغلی کینیچي ماساموتو او مل پلاوي سره په خپل کاري دفتر کې وکتل.
په دې لیدنه کې چې د دې ادارې د مسلکي ریاستونو مسوولینو هم حضور درلود، د مختلفو چاپېریالي موضوعاتو په هکله هر اړخیز بحث او خبرې وشوې.

د چاپېریال ساتنې ملي ادارې عمومي رئیس مولوي مطیع الحق خالص د جاپان نوي سفیر ته ښه راغلاست ووایه، د پخواني سفیر کړنې یې وستایلې او نوي سفیر ته یې په د کارونو په ترسره کولو کې د بریا هیله وکړه.
عمومي رئیس وویل: د صحت او تعلیم په برخو کې چې جاپان کوم خدمات ترسره کړي، قابل د قدر دي. ښاغلي خالص د جاپان له سفیر څخه وغوښتل چې په نړۍوالو چاپېریالي غونډو کې د چاپېریالي کنوانسیونونو او مالي میکانیزمونو کې د افغانستان د پروژو ملاتړ وکړي او همداراز په نړۍوالو چاپېریالي غونډو کې افغان پلاوي ته بلنه ورکړي.

نوموړي وویل چې اقلیمي بدلون د افغانستان له لومړیتوبونو څخه دی او په دې برخه کې باید له افغانستان سره مرسته وشي. ده په خپلو خبرو کې وویل: په تاسف سره باید ووایم چې سږ کال په برازیل هېواد کې د اقلیمي بدلون نړۍوال کنفرانس (COP-30) افغانستان ته د ګډون بلنه ورنه کړل شوه چې دا د افغانانو سره د نړۍوالو توپیري چلند دی، که په نړۍوالو غونډو کې اسلامي امارت ته د ګډون بلنه ور نه کړل شي دا به د چاپېریالي کنوانسیونونو د تعهداتو د پلي کېدو په برخه کې ستونزې پیدا کړي او د افغانانو ستونزې به تر نړۍوالو و نه رسیږي.
عمومي رئیس د جاپان له سفیر وغوښتل چې په چاپېریالي موضوعاتو کې د جاپان له تجربو او امکاناتو څخه دې استفاده وشي.
د جاپان سفیر ښاغلی کینیچي ماساموتو د چاپېریال ساتنې ملي ادارې له عمومي رئیس څخه مننه وکړه او په خپلو خبرو کې یې وویل چې د اسلامي امارت له خوا چې د امنیت په راوستو، مخدره توکو او فساد په له منځه وړلو کې کوم اقدامات ترسره شوي دي، د ستاینې وړ دي. ده هیله وښوده چې د ټولنې د پیاوړتیا او هوساینې لپاره به له حکومت سره په ګډه کار وکړي.

د جاپان سفیر زیاته کړه چې د نړۍوالو سره د افغان حکومت د اړیکو د ښه کولو لپاره به کار وکړي. ده ژمنه وکړه چې د چاپېریال ساتنې ملي ادارې کارکوونکو د ظرفیت لوړونې لپاره به روزنیز پروګرامونه جوړ کړي او له افغانستان سره به خپلو همکاریو ته دوام ورکړي.
په پای کې دواړو خواوو پر ګډه همکارۍ ټینګار وکړ او ژمنه وشوه چې د چاپېریالي موضوعاتو په برخه کې به ګډو همکاریو ته دوام ورکړي.

Nov 11, 2025