وروستی
د چاپېريالي معلوماتي ملي سيستم ښوونيز ورکشاپ پای ته ورسېد
د چاپېريالي ملي معلوماتي سيستم شپږ ورځينی ورکشاپ چې د روان کال د عقرب مياشتې په ۲۸مه نېټه پيل شوی د قوس مياشتې په پنځمه نېټه د تصديق ليکونو په وېشلو سره پای ته ورسېد.
د چاپېريال ساتنې ملي ادارې مالي او اداري معين محمد يوسف حميديان په دې ورکشاپ کې د مرکزي او ولايتي رئيسانو او کارکوونکو له ګډون څخه مننه وکړه او ګډونوالو ته په خطاب کې يې وويل چې هيله ده له دې برنامې څخه مو ښه ګټه پورته کړې وي.
ښاغلي حميديان د دې ورکشاپ له ګډونوالو څخه وغوښتل چې له دې ملي معلوماتي سيستم څخه په خپلو کاري برنامو او همدارنګه نورو برخو کې ګټه پورته کړي او په ولاياتو کې يې هم خپلو همکارانو ته زده کړي.
د يادونې وړ ده چې دا پروګرام د معلوماتي ټکنالوژۍ آمريت لخوا د پروان، کاپيسا، وردک، خوست، پکتيا، پنجشير، بامیان او دايکندي ولايتونو د رئيسانو او کارکوونکو او همدارنګه د مرکزي ادارې يو شمېر کارکوونکو ته ترتيب شوی و چې ګډونوالو ته پکې د کمپيوټري برنامو او د چاپېريالي ملي معلوماتي سيستم څخه د ګټې اخيستنې د څرنګوالي په اړه ګټور او لازم معلومات ورکړل شول.