وروستی
په ملي پلانونو او پالیسیو کې د اقلیمي بدلون اړوند موضوعاتو د ادغام کمېټې دوهمه مشورتي غونډه ترسره شوه
١٤٤٧کال د رجب المرجب دریمه/ کابل
د ملي پلانونو او پالیسیو په چوکاټ کې د اقلیمي بدلون اړوند
موضوعاتو د ادغام کمېټې دوهمه مشورتي غونډه د چاپېریال ساتنې ملي ادارې په کوربتوب
ترسره شوه.
یاده غونډه د قرآنکریم د مبارکو آیتونو په تلاوت سره پیل
شوه، ورپسې د چاپېریال ساتنې ملي ادارې مالي او اداري مرستیال مولوي سعدالدین سعید،
د اجنډا له مخې د اقلیمي بدلون د ملي ستراتیژۍ په اړه هر اړخیزه وینا وکړه. نوموړي
د یادې ستراتیژۍ ارزښت، موخې او د هغې د تطبیق پر اړتیا ټینګار وکړ او ویې ویل چې
اقلیمي بدلون د هېواد پر اقتصادي، ټولنیز او چاپېریالي وضعیت ژورې اغېزې لري، چې د
مخنیوي او سازګارۍ لپاره یې ملي همغږي اړینه ده.
همداراز په غونډه کې د چاپېریال ساتنې ملي ادارې د اقلیمي
بدلون رئیس انجنیر روحالله امین د یادې ملي ستراتیژۍ په تړاو چمتو شوی پرزنټېشن وړاندې
کړ چې پکې د اقلیمي بدلون د خطرونو، لومړیتوبونو، د تطبیق میکانېزمونو او د ادارو
ترمنځ د همغږۍ پر مهمو ټکو رڼا واچول شوه.
په پای کې د غونډې ګډونوالو ازاد بحث وکړ او د اقلیمي بدلون
موضوعاتو د مؤثر ادغام، د ادارو ترمنځ د همکارۍ پیاوړتیا او د ملي پلانونو د پیاوړي
کولو په اړه خپل نظرونه او وړاندیزونه شریک کړه.