وروستی
په ولایتونو کې د چاپېریال ساتنې هڅې؛ عامه پوهاوی، د وحشي ژوو خوندیتوب او د صنعتي فعالیتونو ارزونې ترسره شوي
١٤٤٧کال د رجب المرجب ٩مه/ پکتیا، لغمان، کونړ،
ننګرهار
د هېواد په بېلابېلو ولایتونو کې د چاپېریال ساتنې ریاستونو لهخوا د عامه پوهاوي،
نظارت او ارزونې مهم فعالیتونه ترسره شول، څو د چاپېریال ساتنې فرهنګ پیاوړی او د
طبیعي سرچینو د تخریب مخه ونیول شي.
د پکتیا ولایت د چاپېریال ساتنې ریاست د عامه پوهاوي د پروګرامونو په لړ کې د ګردېز
ښار د «جهان انګلیسي ژبې ښوونیز مرکز» کې زدهکوونکو ته د پاک او سالم چاپېریال،
اقلیمي بدلون، د طبیعي سرچینو ارزښت، د ککړتیا زیانونه او د حیواناتو او مرغانو د ښکار
د مخنیوي په اړه هر اړخیز معلومات وړاندې کړل. ګډونوالو د یاد پروګرام هرکلی وکړ
او د سپارښتنو د عملي کولو ژمنه یې وکړه.
سربېره پر دې د لغمان ولایت د چاپېریال ساتنې ریاست له لوري د «ژوند رڼا خصوصي ښوونځي» ۵۸۵ زدهکوونکو
او استادانو ته د چاپېریال ساتنې فرهنګ د ترویج او د ذهنیت د روښانه کولو په موخه
عامه پوهاوی ورکړل شو. په دې پروګرام کې د نباتاتو، ونو او ځنګلونو ارزښت، د اوبو،
هوا او خاورې د ککړتیا د مخنیوي لارې چارې، د غیر معیاري سپټیکونو زیانونه او د
اوبو له لارې رامنځته کېدونکې ناروغۍ تشریح شوې.
همدارنګه زدهکوونکو ته د «روغ چاپېریال، روغ ژوند» تر عنوان لاندې تبلیغاتي
بروشرونه او توکي ووېشل شول، د ښوونځي مدیر ته د ادارې د پېژندنې کتاب ډالۍ شو او څلور
استادان د چاپېریالي رضاکارانو په توګه ثبت شول.
همدارنګه د کونړ ولایت د چاپېریال ساتنې ریاست د اسعداباد ښار اړوند په مکلی خو ا
اوشا کلي کې د عامه پوهاوي پراخ پروګرام ترسره کړ. په دې پروګرام کې د وحشي ژوو او
الووتونکو مرغانو د ساتنې، د ښکار د قانون تشریح، د ځنګلونو د ارزښت، د ناقانونه
قطع کولو مخنیوي او د اقلیمي بدلون د ناوړه اغېزو په اړه خلکو ته معلومات ورکړل
شول.
د سیمې مشرانو او ځوانانو د چاپېریال ساتنې په برخه کې د همکارۍ ژمنه وکړه.
په همدې لړ کې د ننګرهار ولایت د چاپېریال ساتنې ریاست د سرخرود ولسوالۍ په بهاولۍ
سیمه کې د ګچو د تولید او پروسس له یوه شرکت څخه د چاپېریالي ارزونې په موخه لیدنه
وکړه. د لیدنې پر مهال د فعالیت وضعیت وارزول شو او د نیمګړتیاوو د له منځه وړلو
او د ککړتیا د کمولو لپاره لازمې سپارښتنې وړاندې شوې، چې د شرکت مسئولینو د
عملي کولو ډاډ ورکړ.