وروستی
د چاپېریال ساتنې ملي اداره: رسنۍ او مطبوعات دې د اوبو د ساتنې او اهمیت په اړه له حکومت سره په ګډه خپل مسؤلیت ادا کړي
١٤٤٧کال د رجب المرجب/ کابل
د سلام وطندار راډیو افغانستان د کابل ښار د اوبو سرچینو د
وضعیت په اړه د ترسره شوې سروې پایلې د یوې ځانګړې غونډې په ترڅ کې له رسنیو،
امارتي ادارو مسؤلینو او اړوندو بنسټونو سره شریکې کړې.
د غونډې په پیل کې د سلام وطندار راډیو افغانستان مرستیال
نورمحمد هاشمي د ښه راغلاست وینا وکړه او د جوړې شوې غونډې موخې یې له ګډونوالو
سره شریکې کړې.
ورپسې د چاپېریال ساتنې ملي ادارې مرستیال مولوي سعدالدین سعید
د خپلې وینا پر مهال وویل چې اوبه د ژوند، اقتصاد او ټولنیز ثبات بنسټ جوړوي او
ساتنه یې یوازې تخنیکي موضوع نه، بلکې یو الهي امانت او ملي مسؤلیت دی.
نوموړي د قرآن کریم او نبوي احادیثو په رڼا کې د اوبو پر
سپما او مسؤلانه استفادې ټینګار وکړ او زیاته یې کړه، سره له دې چې افغانستان د
مهمو اوبیزو منابعو لرونکی هېواد دی، خو د اقلیمي بدلون، پرلهپسې وچکالیو، د
واورو کمښت او غیر موسمي بارانونو له امله د اوبو سرچینې له جدي ګواښ سره مخ دي.
د ښاغلي سعید په وینا په کابل ښار کې د ځمکې لاندې اوبو بېساری
کمښت، د کلیوالو سیمو د چینو او کاریزونو وچېدل، د کرنیزو ځمکو د خړوبولو ستونزې
او د څښاک اوبو ککړتیا هغه جدي ننګونې دي چې د خلکو ژوند او روغتیا ګواښي.
د چاپېریال ساتنې ملي ادارې مرستیال زیاته کړه چې دا ستونزه یوازې
د حکومت لپاره نه، بلکې د ټول ملت پر وړاندي ګډه ننګونه ده او رسنۍ کولای شي د
عامه پوهاوي لوړولو، حساب ورکونې او د ولس او حکومت ترمنځ د باور د پیاوړتیا په
برخه کې مهم رول ولوبوي.
نوموړي د سلام وطندار راډیو له لوري د یادې سروې ترسره کول د
رسنیز مسؤلیت ښه بېلګه وبلله او ویې ویل چې دا ډول علمي او میداني څېړنې د پالیسۍ
جوړونې او اغېزمنو پرېکړو لپاره مهم بنسټ برابروي.
د چاپېریال ساتنې ملي ادارې مرستیال ډاډ ورکړ چې یاده اداره
له رسنیو سره د همغږۍ بشپړ چمتووالی لري او د معلوماتو شریکولو، عامه پوهاوي او ګډو
ابتکاري پروګرامونو له لارې به د اوبو سرچینو د ساتنې او دوامدار مدیریت هڅې لا
پراخې کړي.
په دې غونډه کې د اطلاعاتو او کلتور وزارت نشراتي مرستیال،
مولوي حیاتالله مهاجر فراهي، د ایران سفارت فرهنګي اتشې ډاکټر روحالله حسیني، د
خبریالانو د خوندیتوب کمېټې مشر عبدالجمیل وقار او یو شمېر نورو ویناوالو هم خبرې
وکړې.
یاده شوې غونډه د یوه علمي پنل په جوړېدو سره پای ته ورسېده
او د ګډونوالو پوښتنو ته پکې ځوابونه ورکړل شول.