وروستی
د چاپېریال ساتنې ملي ادارې او (EPTDO) موسسې ترمنځ د پروژې د تطبیق په موخه هوکړهلیک لاسلیک شو
١٤٤٧کال د رجب المرجب ٢٠مه/ کابل
د اقلیمي بدلون اړوند چاپېریالي پروژې تطبیق په موخه د چاپېریال
ساتنې ملي ادارې او (EPTDO) موسسې
ترمنځ د ۱۵۰
زره امریکایي ډالرو په ارزښت د همکارۍ تفاهم لیک لاسلیک شو.
یاد تفاهم لیک د چاپېریال ساتنې ملي ادارې د عمومي رئیس
مولوي مطیع الحق خالص او د (EPTDO) موسسې
د مشر عبدالهادي اڅکزي ترمنځ د ۱۴۴۶
هـ ق کال د رجب المرجب په ۲۰مه
نېټه د چاپېریال ساتنې ملي ادارې په مرکزي دفتر کې لاسلیک شو.
د تفاهم لیک د لاسلیک پر مهال د
(EPTDO) موسسې مشر عبدالهادي اڅکزي وویل چې دا پروژه به
د پلان له مخې په بشپړه شفافیت، مسؤلیتپذیرۍ او تخنیکي معیارونو سره عملي شي، تر څو
عملي پایلې ولري او ګټه یې په مستقیم ډول خلکو او ځايي ټولنو ته ورسېږي. نوموړي زیاته
کړه چې د ټولنې فعاله ونډه، عامه پوهاوی او د خلکو همکاري د پروژې د بریالیتوب مهم
بنسټونه دي.
د دې تفاهم لیک له مخې د ټولنیزو خدماتو بسیج، عامه پوهاوی
او د ټولنې د چمتووالي په برخه کې ګډ فعالیتونه ترسره کېږي. یاده پروژه چې د (۱۵۰٬۰۰۰) امریکایي ډالرو په ارزښت ده او
د UNDP له
لوري تمویلېږي، موخه یې د اقلیمي بدلون سره د سازښت، چاپېریالي ګواښونو په تړاو د
خلکو او ټولنو د پوهاوي کچې او ظرفیت لوړول او همداراز د اړوندو معلوماتو او
ارقامو راټولول دي.
پر همدې مهال د چاپېریال ساتنې ملي ادارې عمومي رئیس مولوي
مطیع الحق خالص وویل اداره به د دې پروژې د تطبیق بهیر په جدي توګه وڅاري، څو یاده
پروژه په سمه، اغېزمنه او هدفمنده توګه عملي شي او واقعي ګټه یې خلکو ته ورسېږي.
نوموړي ټینګار وکړ چې د چاپېریال ساتنې ملي اداره د اقلیمي
بدلون پر وړاندې د خلکو د پوهاوي کچي لوړول او د ټولنو پیاوړتیا خپله ملي دنده ګڼي.
دا پروژه به د شپږو میاشتو په موده کې د بدخشان ولایت د ارګو
او کشم ولسوالیو په حافظ مغول، ګندم قول او سرای مشهد کلیو کې د چاپېریال ساتنې
ملي ادارې تر مستقیم نظارت لاندې عملي شي.
د چاپېریال ساتنې ملي اداره ژمنه ده چې د هېواد د چاپېریالي
وضعیت د ښه والي په موخه به د ملي او نړیوالو بنسټونو په همکارۍ د اغېزناکو چاپېریالي
پروژو د جلب او تطبیق هڅې لا پسې پراخې کړي.