وروستی
د چاپېریالي چارو مفتشینو له لوري ولایتونو کې مختلف فعالیتونه ترسره شول
۱۴۴۷ کال د رجب المرجب ۲۱مه/پکتیکا-ارزګان-کندز-ننګرهار-کونړ
د پکتیکا، ارزګان، کندز، ننګرهار او کونړ ولایتونو د چاپېریال
ساتنې ریاستونو مسوولینو له لوري د تېرو دوو ورځو په لړ کې مختلف فعالیتونو ترسره
شوي دي.
د پکتیکا ولایت د چاپېریال ساتنې رئیس په مشرۍ په ښار کې د
چاپېريالي ستونزو د له منځه وړلو په موخه پکتيکا ښاروال سره د همغږۍ غونډه ترسره
شوه، د مختلفو چاپېریالي ستونزو او حل لارو په هکله بحث وشو؛ همداراز د یاد ریاست
د عامه پوهاوي ټیم له لوري ښرنه کې د ځانګړې قطعې ځواکونو ته د ځنګلونو د قطع کولو
د مخنيوي، د ځنګلونو، وحشي ژويو او مرغانو د ارزښت، د ښکار او قاچاق د مخنيوي او
همدارنګه د پاک او سالم چاپېریال د ارزښت او اهمیت په اړه د عامه پوهاوي غونډه
ترسره شوه.
د ارزګان د چورې ولسوالي کې څلور تنه ښکاريان د ښکار پر مهال
ونيول شول، ښکاري وسایل یې ضبط، نیول شوي مرغان خپل طبیعي چاپېریال ته خوشي شول او
له ښکاریانو لیکلې ژمنې واخیستل شوې چې نور به ښکار نه کوي او که بیاځلي ونیول شول
د قانون منګولو ته به وسپارل شي.
د شنو ساحو د پراختیا په موخه د ننګرهار ولایت د چاپېریال
ساتنې ریاست د رها مؤسسې او کرنې ریاست په هکمکارۍ د پچیراګام ولسوالۍ د بامهخېلو
سیمه کې د شپږ زره مثمر او غیر مثمر نیالګیو د کېنولو لپاره ځایونه وټاکل شول.
د کونړ ولایت د چاپېریال ساتنې رئیس ډاکټر محمدالرحمن صابر
په مشرۍ نظارتي ټیم له لوري اسعداباد ښار کې د مختلفو اصنافو د چاپېریالي وضعیت څارنه
وشوه، مسوولینو ته یې لازمې لارښوونې او سپارښتنې وشوې.
د کندز ولایت د چاپېریال ساتنې ریاست مفتشینو له لوري د علي
اباد ولسوالۍ کې د گچ او چونې ډبرو د
استخراج معدن د چاپېریالي وضعیت ارزونه وشوه.