وروستی
کابل پوهنتون کې د چاپېریالي پایښت او طبیعي زیرمو د مدیریت تر عنوان لاندي علمي او څېړنیز کنفرانس جوړ شو
١٤٤٧کال د رجبالمرجب ٢٤مه/ کابل
د کابل پوهنتون له لوري د «چاپېریالي پایښت، پېښو او طبیعي زیرمو
مدیریت» تر عنوان لاندې علمي او څېړنیز کنفرانس جوړ شو، چې پکې د چاپېریال ساتنې
ملي ادارې عمومي رئیس، د لوړو زده کړو وزارت استازو، د کابل پوهنتون رهبرۍ،
علماوو، استادانو، څېړونکو او محصلینو ګډون کړی و.
د چاپېریال ساتنې ملي ادارې عمومي رئیس مولوي مطیعالحق خالص
په خپله وینا کې چاپېریال د ژوند، روغتیا، اقتصاد او ملي ثبات بنسټ وباله او ویې ویل
چې افغانستان د اقلیمي بدلون له جدي اغېزو لکه وچکالۍ، سیلابونو، د اوبو کمښت او
هوا ککړتیا سره مخ دی، چې د حل لپاره یې علمي، ملي او ټولنیز مشارکت ته اړتیا ده.
نوموړي د پېښو د اغېزمن مدیریت، د خطرونو د کمولو او د طبیعي
زیرمو د پایښتمن مدیریت پر ارزښت ټینګار وکړ او د پوهنتونونو او علمي بنسټونو رول یې
د پالیسۍ جوړونې لپاره بنسټیز وباله.
نوموړي همداراز پر دې هم ټینګار وکړ چې علمي څېړنې باید عملي
بڼه خپله کړي او د هېواد د سالم، خوندي او پایښتمن چاپېریال لپاره اغېزمن ګامونه
واخیستل شي.