وروستی
د چاپېریال ساتنې ملي ادارې او (Access Point) شرکت ترمنځ د ۱۵۰ زره امریکايي ډالرو په ارزښت د پروژې د تطبیق هوکړهلیک لاسلیک شو
١٤٤٧کال د رجبالمرجب ٢٨مه/ کابل
د چاپېریال ساتنې ملي ادارې او
(Access Point) مشورتي او مالي شرکت ترمنځ د ۱۵۰ زره امریکايي ډالرو په ارزښت
د یوې مهمې چاپېریالي او اقلیمي بدلون اړوند پروژې د تطبیق په موخه هوکړهلیک لاسلیک
شو.
یاد هوکړهلیک د چاپېریال ساتنې ملي ادارې د عمومي رئیس
مولوي مطیعالحق خالص او د اکسس پواینټ شرکت د رئیس اجمل مومند له لوري لاسلیک شو،
چې موخه یې د اقلیمي بدلون پر وړاندې د ټولنو د چمتووالي لوړول، د طبیعي سرچینو
ساتنه، د ځنګلونو پراختیا او د خلکو د معیشت ښه کول دي.
د دې پروژې د تطبیق اساسي فعالیتونه د عامه پوهاوي پروګرامونه،
د محلي خلکو او کمېټو ظرفیت لوړونه، د ځنګلکارۍ او نیالګیو کېنولو ملاتړ، د اقلیمي
خطرونو د کمولو لپاره د معلوماتو راټولول، د کوچنیو معیشتي بدیلو پروژو پلي کول او
د چاپېریال ساتنې په برخه کې د ټولنېمحوره پلانونو جوړول دي.
د پروژې له مخې به په ټاکل شوو سیمو کې لسګونه ښوونیزې ناستې،
د ځايي کمېټو جوړښت او پیاوړتیا، د نیالګیو د کرلو او ساتنې لپاره چمتووالی، د کرنیزو
بستهجاتو وېش، د ټولنیز بسیج فعالیتونه او همدارنګه د چاپېریالي ستونزو د ثبت او
تعقیب مېکانېزم رامنځته شي.
یاده پروژه چې د UNDP له
لوري تمویلیږي د شپږو میاشتو په موده کې به په کونړ ولایت کې د چاپېریال ساتنې ملي
ادارې تر مستقیم نظارت او همغږۍ لاندې، د اکسس پواینټ شرکت له خوا تطبیق شي. په دې
لړ کې به د قوانینو، طرزالعملونو او ملي تګلارو رعایت تضمین کېږي او د پروژې پرمختګ
به په منظم ډول راپور شي.
د چاپېریال ساتنې ملي ادارې عمومي رئیس مولوي مطیعالحق خالص
د دې هوکړهلیک لاسلیک د اقلیمي بدلون پر وړاندې د ګډو هڅو، مؤثرې همکارۍ او
دوامدار پرمختګ په لور یو مهم ګام وباله او ټینګار یې وکړ چې د ورته پروژو تطبیق د
چاپېریال ساتنې، د خلکو د ژوند د ښه والي او د طبیعي سرچینو د دوامدار مدیریت
لپاره حیاتي ارزښت لري.
د Access Point شرکت
رئيس اجمل مومند ژمنه وکړه چې ورکړل شوې پروژه به د اصولو سره سم په ښه ډول تطبیق
کړي او په دې سره به د کونړ خلکو ته لازم خدمتونه او پروګرامونه عملي شي.