وروستی
د چاپېریال ساتنې ملي ادارې عمومي رئیس د IFRC د اسیا پاسیفیک برخې له رئيس او مل پلاوي سره وکتل
١٤٤٧ کال د شعبان ۲مه/ کابل
د چاپېریال ساتنې ملي ادارې عمومي رئیس مولوي مطیعالحق خالص
د ۱۴۰۴کال د
سلواغې په لومړۍ نېټه په خپل کاري دفتر کې د سره صلیب او سرې میاشتې ټولنې نړۍوال
فدراسیون (IFRC) د اسیا
پاسیفیک برخي له رئیس الکساندر متیو او د افغانستان لپاره د
IFRC له مسؤل ډاکټر حسام فیصل سره وکتل.
په پیل کې د چاپېریال ساتنې ملي ادارې عمومي رئيس الکساندر
متیو او ورسره پلاوي ته ښه راغلاست ووایه او د افغانستان د چاپېریالي وضعیت، وچکالۍ
او چاپېریالي ستونزو په اړه یې ورسره بحث او خبري وکړې.
عمومي رئیس وویل: افغانستان د وچکالۍ له امله ډیر زیانمن شوی،
د افغانستان طبیعي یخچالونه مخ پر ویلې کېدو دي، د ځمکې لاندې اوبه کمې شوې، د کرنې
او مالدارۍ سکتورونه سخت زیانمن شوي دي. په ډیرو ولایتونو کې خلک د خپلو مېنو او
کورونو پرېښودو ته اړ شوي دي، په یو شمېرو ولایتونو کې خلک حتی خپلو څارویو لپاره
اوبه په بیه اخلي.
ښاغلي خالص وویل له بلې خوا د مهاجرینو ستونزې هم د اندیښنې
وړ دي چې که دې برخو کې نړۍوالي مرستې و نه شي وضعیت به نور هم خراب شي. نوموړي ټینګار
وکړ چې بشري موضوعاتو ته باید په نړۍواله کچه پاملرنه وشي او د سره صلیب او سرې میاشتې
نړۍوال فدراسیون (IFRC) له
مسوولینو څخه یې غوښتنه وکړه چې د چاپېریالي ستونزو، کرنې او مالدارۍ او د اوبو د
مدیریت په برخو کې دې همکاري وکړي.
د سره صلیب نړۍوال فدراسیون
(IFRC) د اسیا پاسیفیک برخي مشر الکساندر متیو له عمومي
رئیس څخه مننه وکړه چې د لیدو فرصت یې ورکړ، نوموړي وویل چې افغانستان ته زما د
سفر موخه همدا ده چې د مهاجرینو، زلزله ځپلو ستونزې له نژدې وګورم او همداراز غوښتل
مې چې د افغانستان د چاپېریالي وضعیت په هکله هم معلومات ولرم.
نوموړي وویل موږ به خپلو هڅو ته دوام ورکړو او کوښښ به وکړو
چې په نړۍواله کچه د افغانستان لپاره د مرستو راجلبولو زمینه مساعده شي.
ده د افغانستان لپاره د
IFRC مسؤل ډاکټر حسام فیصل ته سپارښتنه وکړه چې د چاپېریال
ساتنې ملي ادارې سره خپلو ګډو او نژدې همکاریو ته دوام ورکړي.
د چاپېریال ساتنې ملي ادارې عمومي رئیس ډاډ ورکړ چې د چاپېریال
ساتنې ملي اداره چمتو ده له نړیوالو مرستندویه بنسټونو سره ګډې تخنیکي طرحې او
پلانونه شریک کړي، ترڅو په پلي کېدو سره يې لازم اقدامات ترسره شي.