وروستی
د چاپېریال ساتنې ملي ادارې عمومي رئيس د آذربایجان له سفیر سره وکتل
١٤٤٧کال د شعبان ٩مه/ کابل
د چاپېریال ساتنې ملي ادارې عمومي رئیس الحاج مولوي مطیعالحق
خالص په افغانستان کې د آذربایجان له سفیر الهام محمدوف سره وکتل.
په دې کتنه کې دواړو لورو د اقلیم بدلون، نړیوالو کنفرانسونو
کې د افغانستان د ګډون، تخنیکي همکاریو او د دوه اړخیزو چاپېریالي اړیکو د پیاوړتیا
په اړه هر اړخیز بحث او خبرې وکړې.
د چاپېریال ساتنې ملي ادارې عمومي رئیس د آذربایجان دولت له
دوامدارو همکاریو مننه وکړه او په ځانګړي ډول یې د
COP_29 کنفرانس په تړاو د افغانستان د ګډون د تسهیل
لپاره د آذربایجان د دیپلوماتیکو هڅو قدرداني وکړه. نوموړي وویل که څه هم
افغانستان COP-30 نړۍ
وال کنفرانس ته ونه بلل شو، خو د آذربایجان هېواد ملاتړ او همکاري د ستایني وړ ده
او افغان حکومت یې له هلوځلو مننه کوي.
ښاغلي خالص همداراز د
COP_31 د اقلیمي بدلون نړۍوال کنفرانس چې ټاکل شوې په
ترکیه کې ترسره شي له آذربایجان څخه وغوښتل چې د ترکیې له حکومت، د UNFCCC له سکرتریت او نورو اړوندو نړیوالو
مراجعو سره همغږي وکړي، تر څو د افغانستان رسمي ګډون ته زمینه برابره شي.
نوموړي ټینګار وکړ چې د افغانستان ګډون د سیمې د اقلیمي ننګونو
د ګډ مدیریت لپاره یو عملي ضرورت دی.
په دې کتنه کې د WUF_13 نړیوال
ښاریتوب کنفرانس په اړه هم خبرې وشوې چې ټاکل شوې په آذربایجان کې ترسره شي. د چاپېریال
ساتنې ملي ادارې عمومي رئیس وویل د دې کنفرانس لپاره ادارې ته رسمي بلنلیک رسېدلی
او هیله یې څرګنده کړه چې د آذربایجان دولت د افغان پلاوي د ګډون د تسهیل، ویزې،
سفر، لوژستیکي اسانتیاوو او تخنیکي پروسو په برخه کې ځانګړې همکاري وکړي.
عمومي رئیس په چاپېریالي څارنه، د هوايي کیفیت د کنټرول، GIS، ریموټ سنسینګ او ډیجیټلي وسایلو په برخه کې د تخنیکي همکاریو، د ګډو
څېړنیزو او د اقلیمي بدلون سره د سازښتي پروژو، د پایدار ښاري او کلیوالي چاپېریالي
پلانونو د تجربو د تبادلې او د ځنډېدلو چاپېریالي پروژو د بیا پیلیدو په برخه کې د
آذربایجان هېواد له سفیر څخه د همکارۍ غوښتنه وکړه.
په دې ناسته کې د آذربایجان سفیر ښاغلي الهام محمدوف د دواړو
هېوادونو ترمنځ د تاریخي اړیکو او دوستانه همکاریو یادونه وکړه او ویې ویل چې
آذربایجان د افغانستان د چاپېریالي او اقلیمي ننګونو درک کوي او هڅه کوي چې دا
موضوعات په سیمهییزو او نړیوالو فورمونو کې مطرح وساتي.
نوموړي د COP_31 کنفرانس
چې ټاکل شوې په ترکیه کې ترسره شي په اشارې سره ډاډ ورکړ چې د آذربایجان دولت به د
ترکیې له اړوندو مراجعو، د UNFCCC له
سکرتریت او نورو نړیوالو بنسټونو سره د همغږۍ په برخه کې همکاري وکړي تر څو د
افغانستان د رسمي ګډون لپاره ممکنې لارې وڅېړل شي.
همداراز د آذربایجان سفیر د
WUF_13 نړیوال کنفرانس چې ټاکل شوې په آذربایجان کې
ترسره شي، وویل هېواد یې د دې کنفرانس کوربهتوب ته ځانګړی اهمیت ورکوي او ژمنه یې
وکړه چې د افغان پلاوي د ګډون لپاره به له اړوندو ادارو سره لازمه همغږي ترسره کړي.
په دې کتنه کې د آذربایجان سفیر همداراز د چاپېریالي څارنې،
هوايي کیفیت د کنټرول، GIS، ریموټ
سنسینګ او ډیجیټلي وسایلو په برخه کې د خپل هېواد د همکاریو ډاډ ورکړ او ویې ویل چې
آذربایجان چمتو دی د تخنیکي تجربو د انتقال، د سافټویرونو د شریکولو او د افغان
تخنیکي ټیمونو د روزنې په برخه کې همکاري وکړي.
په پای کې د دواړو هېوادونو ترمنځ د دوه اړخیزو چاپېریالي
همکاریو د چوکاټ جوړولو او د یوه دایمي ګډ چاپېریالي کاري ګروپ د رامنځته کولو پر
اړتیا ټینګار وشو تر څو دا همکارۍ منظمې، عملي او دوامدارې شي.