په ننګرهار کې د نیالګیو کېنولو ملي کمپاین رسما پیل شو

١٤٤٧کال د شعبان ٢٣مه/ ننګرهار
د ننګرهار ولایت په پچيراګام ولسوالۍ کې د نیالګیو کېنولو ملي کمپاین د یوې چاپېریالي پروژې په چوکاټ کې په رسمي ډول پیل شو.
دا پروژه چې د رها موسسې په همکارۍ تطبیق کیږي له مخې به یې ۶۰۰۰ مېوه لرونکي او غیر مېوه لرونکي نیالګي کېنول شي. د اوبو لګولو لپاره به ۲۰ سولري تختې نصب او د پایپ لاین سیستم به وغځول شي او د دې ترڅنګ به د ولسوالۍ اوسېدونکو ته کاري زمینه برابره شي.

په دې مراسمو کې د افغانستان ا.ا.ا د چاپېریال ساتنې ملي ادارې عمومي رئیس الحاج مولوي مطیع‌الحق خالص، د ننګرهار ولایتي مسؤلینو، د مرستندویه موسساتو استازو او ولسي مشرانو برخه اخیستې وه.
د چاپېریال ساتنې ملي ادارې عمومي رئیس په خپله وینا کې ټینګار وکړ چې افغانستان په تېرو څلوېښتو کلونو کې د جګړو او بې‌امنۍ له امله سخت زیانمن شوی او ګڼ شمېر طبیعي ځنګلونه یې له منځه تللي دي. نوموړي وویل د هېواد بیا رغونه یوازې د زیربناوو په جوړولو نه، بلکې د طبیعي سرچینو په احیا او ساتنې پوري هم تړلې ده.
هغه زیاته کړه یوازې تېر کال د چاپېریال ساتنې ملي ادارې له لوري په هېواد کې له اوولس میلیونو زیات نیالګي کېنول شوي دي او دا لړۍ به په پوره عزم دوام ومومي.

ښاغلي خالص څرګنده کړه: «افغانستان به په خپل ملي عزم او ګډو هڅو رغېږي. که هر څوک د هېواد د ابادۍ لپاره لاس را اوږد کړي، موږ به د هېواد په ابادولو کې ورسره په پوره اخلاص همکاري وکړو.»
عمومي رئیس ځنګلونه ملي شتمني وبلله او ویې ویل چې ساتنه او پالنه یې د ټولو ګډ مسؤلیت دی، ځکه دا د راتلونکو نسلونو امانت دی. د هغه په وینا نیالګي د اورښتونو د تنظیم، د سېلابونو د مخنیوي، د هوا د ککړتیا د کمولو او د اقتصادي پیاوړتیا په برخه کې بنسټیز رول لري.
ده همداراز پر ولسونو غږ وکړ چې د نیالګیو په کېنولو، ساتنه او زرغونتیا کې له حکومت سره بشپړه همکاري وکړي او په دې برخه کې له هیڅ راز مرستي څخه درېغ ونه کړي.

په مراسمو کې د ننگرهار ولایتي مسؤلینو، د UNDP او رها موسسې استازو او ولسي مشرانو په خپلو ویناوو کې د نیالګیو کېنولو او ساتنې پر اهمیت ټینګار وکړ او له ولس څخه یې وغوښتل چې د شنو ساحو د پراختیا او چاپېریال ساتنې په برخه کې فعاله ونډه واخلي.
د مراسمو په پای کې ګډونوالو په عملي ډول نیالګي کېنول او د کرل شویو نیالګیو د ساتنې ژمنه یې وکړه.

Feb 12, 2026