وروستی
د نیالګیو کېنولو په تړاو د عامه پوهاوي غونډه او علمي بحث ترسره شو
١٤٤٧کال د شعبان ٢٩مه/ کابل
د نیالګیو کېنولو ملي کمپاین د پیاوړتیا او د زرغونتیا د
فرهنګ د دودولو په موخه د عامه پوهاوي غونډه او علمي بحث په باختر پوهنتون کې
ترسره شو.
په دې غونډه کې د چاپېریال ساتنې ملي ادارې پالیسي او مسلکي
مرستیال مولوي ډاکټر زینالعابدین عابد، د باختر پوهنتون رئیس احمد فرید عارفي، د
پوهنتون استادانو، د یووالي او پیوستون موسسې مرستیال او کارکوونکو او همداراز د
رسنیو استازو ګډون کړی و.
غونډه د قرآن کریم د مبارکو آیتونو په تلاوت سره پیل شوه،
ورپسې د باختر پوهنتون رئیس ګډونوالو ته ښه راغلاست ووایه او د چاپېریال ساتنې،
زرغونتیا او علمي بنسټونو د رول په اړه یې خبرې وکړې. نوموړي ټینګار وکړ چې
پوهنتونونه کولای شي د پوهاوي، څېړنې او عملي اقداماتو له لارې د چاپېریال ساتنې
په برخه کې مهم رول ولوبوي.
وروسته د چاپېریال ساتنې ملي ادارې پالیسي او مسلکي مرستیال
مولوي ډاکټر زینالعابدین عابد هر اړخیزه وینا وړاندې کړه. هغه د نیالګیو کېنولو
ملي کمپاین پر اهمیت رڼا واچوله او ویې ویل چې نیالګي د هوا د پاکوالي، د اقلیمي
بدلون د اغېزو د کمښت، د خاورې د ساتنې او د طبیعي توازن د ټینګښت اساسي وسیله ده.
نوموړي د علمي بنسټونو او ځوانانو ونډه حیاتي وبلله او زیاته
یې کړه چې د دوامدارو پایلو لپاره همغږي او ګډ کار اړین دی.
ښاغلي عابد همداراز زیاته کړه اداره هڅه کوي چې د نیالګیو کېنولو
تر څنګ د هغو د ساتنې، پالنې او بقا کچې لوړولو ته هم ځانګړې پاملرنه وکړي. ځکه
هدف یوازې د شمېر زیاتوالی نه، بلکې د دوامدار زرغونتیا تأمین دی. ده وویل په همدې
موخه به د اړوندو ادارو په همکارۍ د څارنې میکانېزمونه پیاوړي شي او د عامه پوهاوي
پروګرامونه به لا پراخ شي.
د ادارې مسلکي مرستيال څرګنده کړه موږ باور لرو، که هر فرد
لږ تر لږه یو نیالګی کېنوي او د هغه پالنه په اخلاص ترسره کړي، نو په لنډ وخت کې
به زموږ ښارونه، کلي او دښتې زرغونې شي او د اقلیمي بدلون منفي اغېزې به راکمې شي.
ده یو ځل بیا له هېوادوالو غوښتنه وکړه چې د نیالګیو د کېنولو
په دې ملي پروسه کې برخه واخلي او راتلونکو نسلونو ته یو سالم او سمسور افغانستان
په میراث پرېږدي.
ورپسې د یووالي او پیوستون موسسې مرستیال فرید احمد لودین
خبرې وکړې او د خپلې موسسې د همکارۍ پلانونه یې له ګډونوالو سره شریک کړل. هغه ډاډ
څرګند کړ چې یاده موسسه به د عامه پوهاوي، تخنیکي ملاتړ او عملي پروګرامونو له لارې
د نیالګیو کېنولو کمپاین ملاتړ ته دوام ورکړي.
په غونډه کې د باختر پوهنتون یو تن استاد خپله چمتو شوې
علمي وینا وړاندې کړه او د نیالګیو کېنولو علمي، اقتصادي او ټولنیزو ګټو ته یې
اشاره وکړه. هغه وړاندیز وکړ چې د څېړنیزو پروژو او محصلینو د عملي فعالیتونو له
لارې دې د زرغونتیا فرهنګ لا پیاوړی شي.