وروستی
په فراه کې د نیالګیو کېنولو ملي کمپاین رسما پیل شو
١٤٤٧کال د شعبان ٢٩مه/ فراه
د فراه پوهنتون په انګړ کې د نیالګیو کېنولو ملي کمپاین تیره
ورځ د یوې رسمي غونډې په ترڅ کې پرانیستل شو. په دې مراسمو کې د چاپېریال ساتنې
ملي ادارې عمومي رئیس الحاج مولوي مطیع الحق خالص، د فراه ولایت والي ملا محمد
حافظ مجاهد او یو شمېر نورو سیمهییزو مسؤلینو ګډون کړی و.
غونډه د فراه د چاپېریال ساتنې رئیس حافظ برهان الدین راشد
په پرانیستې وینا او ښه راغلاست سره پیل شوه. نوموړي د نیالګیو کېنولو ارزښت ته په
اشارې وویل چې زرغون چاپېریال د سالمې ټولنې بنسټ جوړوي او د طبیعي سرچینو ساتنه ګډ
ملي مسؤلیت دی.
ورپسې د چاپېریال ساتنې ملي ادارې عمومي رئیس الحاج مولوي
مطیع الحق خالص د خپلو خبرو پر مهال د فراه ولایت د خلکو د تېرو قربانیو یادونه وکړه
او ویې ویل چې دغه قربانۍ د اسلامي نظام د ټینګښت او ساتنې لپاره ورکړل شوې دي.
نوموړي ځوانان د ټولنې اساسي پانګه وبلله او زیاته یې کړه چې د هېواد پرمختګ او
سوکالي د ځوان نسل له علمي، فکري او اخلاقي ودې سره نېغ تړاو لري. هغه ټینګار وکړ
چې د ملت ستره پانګه پر ځوانانو لګول شوې، نو له همدې امله له هغوی څخه د راتلونکي
په جوړولو کې سترې هیلې کېږي.
ښاغلي خالص د خپلو خبرو پر دوام وویل د نیالګیو کېنولو ملي
کمپاین یوازې یو موسمي پروګرام نه دی، بلکې دا د هېواد د زرغونتیا، د اقلیمي
بدلونونو د منفي اغېزو د کمولو او د طبیعي سرچینو د ساتنې لپاره یو ستر ملي حرکت دی.
نوموړي څرګنده کړه چې ونې د چاپېریال د توازن ساتلو، د هوا د ککړتیا د کمولو، د
خاورې د فرسایش د مخنیوي او د اوبو د سرچینو د پیاوړتیا مهم رول لري.
هغه څرګنده کړه چې نیالګي کېنول نه یوازې چاپېریالي ارزښت
لري، بلکې اقتصادي ګټې هم لري، ځکه چې زرغون چاپېریال د کرنې، مالدارۍ او سیمهییز
اقتصاد د ودې لامل ګرځي. ده ټینګار وکړ چې هره کېنول شوې ونه باید تر ساتنې او
پالنې لاندې ونیول شي، څو د راتلونکو نسلونو لپاره دوامداره ګټه ولري.
عمومي رئیس همدارنګه زیاته کړه دا ملي کمپاین د اسلامي ارزښتونو
سره سم یو خیرخواهانه او ثوابي عمل دی، ځکه چې ونه د انسان، حیوان او طبیعت لپاره ګټه
رسوي او هر هغه څوک چې د ونې په کېنولو او پالنه کې برخه اخلي، د دوامدار اجر
مستحق ګرځي.
د چاپېریال ساتنې ملي ادارې عمومي رئیس ځوانان او محصلین وهڅول
چې د علم ترڅنګ عملي مسوولیت هم پر غاړه واخلي او د نیالګیو کېنولو، ساتنې او د
چاپېریالي پوهاوي په خپرولو کې مخکښ رول ولوبوي، څو د زرغون او پاک افغانستان د جوړېدو
لپاره بنسټیز ګامونه پورته شي.
د فراه والي ملا محمد حافظ مجاهد هم په خپلو څرګندونو کې وویل
چې زرغونتیا او ښاري سمسورتیا یوازې د حکومت مسؤلیت نه دی، بلکې د ټولنې د هر فرد ګډ
مکلفیت دی. نوموړي د نیالګیو کېنول د دوامدارې صدقې په توګه یاد کړل او له خلکو یې
وغوښتل چې د ښار د ښکلا او چاپېریالي ساتنې په برخه کې فعاله ونډه واخلي.
د فراه پوهنتون علمي مرستیال مفتي عبدالظاهر او یو تن استاد
عصمت الله حیدري د نیالګیو کېنول د چاپېریالي ککړتیا د کمولو لپاره مهم ګام وباله
او ویې ویل چې فراه ولایت د کرنیزو محصولاتو د پراختیا پراخ ظرفیتونه لري. نوموړي
د دغو ظرفیتونو د اغېزمنې استفادې لپاره د ګډو همکاریو پر پیاوړتیا ټینګار وکړ.