وروستی
ګردیز ښار کې د چاپېریال ساتنې فرهنګ ترویج په پار عمومي حشر ترسره شو
۱۴۴۷ کال د رمضان لومړۍ نېټه/ پکتیا
د پکتیا ولایت د چاپېریال ساتنې ریاست له لوري (موږ د چاپیریال
ساتنې فرهنگ ته وده ورکوو او د ژوند چاپیریال ساتنه مو اصلي هدف دی) تر عنوان لاندې
ګردیز ښار کې د پاککارۍ عمومي حشر ترسره شو.
د پاککارۍ په دې حشر کې د مختلفو امارتي اداراتو مسوولینو
او استازو، د ځوانانو چارو د همغږۍ موسسې مسوول، گردیز ښار د گذروکیلانو، مختلفو
اصنافو کلانترانو، مطبوعاتو، متنفذینو، دکاندارانو او سلگونو تنو ښاریانو او ځوانانو
گډون کړی وو.
پدې حشر کې د پکتیا
ولایت د چاپیریال ساتنې رئیس، د پېښو سره د مبارزې آمادگۍ رئیس، گردیز ښاروالۍ او
اطلاعاتو او فرهنگ ریاست استازو هر اړخیزې ویناوې وکړې او له هیوادوالو څخه یې وغوښتل
چې د خپل ښار او هېواد په پاکۍ او نظافت کې تل هڅه وکړي او له ټولو ښاریانو او گډونکونکو
څخه یې مننه وکړه چې په دې حشر کې یې ونډه اخیستې.
د
پکتیا ولایت د چاپیریال ساتنې رئیس مولوي عبدالهادي هدایت د چاپیریال ساتنې فرهنگ
د ترویج د اهمیت په اړه خبرې وکړې او ټول ښاریان یې د ښار پاکي او نظافت ته تشویق
کړل؛ ترڅو چې سالم او پاک چاپیریال رامنځته شي.
ښاغلي هدایت وویل چې نظافت د ایمان جز دی او ټول مسوولیت
لرو چې خپل چاپیریال پاک وساتو او د هوا، اوبه او خاورې ککړتیا څخه په جدي توگه
مخنیوۍ وکړو؛ ترڅو د انسانانو او نورو ژونديو موجوداتو ژوند او روغتیا له خطر او
گواښ سره مخامخ نشي.
ښاغلي هدایت زیاته کړه چې ښار ته د خپل کور په نظر وگورو او
راتلونکي نسلونو ته پاک چاپیریال پریږدو، هیوادوال او ځوانان دې ته وهڅوو چې خپل
چاپیریالي فرهنگ ته پوره پاملرنه وکړي ترڅو چې ځوانان په گډه د چاپیریال په
پاکوالي کې رغنده او فعاله ونډه واخلي او خلکو ته دا انگیزه ورکړي چې ښار د دوی
کور دی او باید په پاک ساتلو کې جدي پاملرنه وکړي.
د حشر په لړ کې گردیز ښاریانو ته د لوډسپیکرونو له لارې د
کثافاتو او خځلو څخه پاک او ښاري فرهنگ دودولو پیغامونه خپاره شول.
د کال په اوږدو کې د پکتیا ولایت د چاپیریال ساتنې ریاست،
گردیز ښاروالۍ او نورو اړوندو ادارو له لورې د عامه پوهاوي مختلفې برنامې په لاره
اچول کیږي؛ ترڅو ښاریان او هېوادوال د خپل چاپیریال په پاکوالي کې رغنده او فعاله
ونډه واخلي.