کونړ کې د اړوندو ریاستونو له مسئولینو سره د همغږۍ غونډه ترسره شوه

۱۴۴۷ کال د رمضان ۲نېټه/ کونړ
د کونړ ولایت د چاپېریال ساتنې ریاست د ملګرو ملتونو د پراختیايي ادارې (UNDP) د مسئولینو سره په همکارۍ د اسعدآباد ښار په سپوږمۍ هوټل کې د ولایت مقام، اړوندو امارتي ادارو، خصوصي ادارو، علمای کرامو، ځوانانو، قومي مشرانو او رسنیو له استازو او مسئولینو سره د کونړ په ولایت کې د پنځه کلنې پروژې د تطبیق په موخه د همغږۍ غونډه ترسره شوه.
غونډه د قرآنکریم په مبارکو آیتونو سره پیل شوه. د غونډې پرانیستونکې وینا او ګډونوالو ته ښه راغلاست د چاپېریال ساتنې رئیس مولوي محمد رحمن صابر له لوري وړاندې شوه، او د اړوندې پروژې د اهمیت، موخو او ارزښت په اړه هر اړخیز معلومات شریک شول. نوموړي ټینګار وکړ چې د امارتي ادارو مسئولین او ولسي خلک باید په خپله برخه کې پوره همکاري وکړي څو د اقلیمي بدلون پر وړاندې د مبارزې مسئولیت په سمه توګه ترسره شي. همدارنګه د نیالګیو کېنولو موسم ته په اشارې سره یې د نیالګیو کېنولو، ساتنې او ارزښت په اړه لازم معلومات وړاندې کړل.

د کونړ ولایت د کارکوونکو چارو محترم رئیس مولوي امیرولي له لوري د چاپېریال ساتنې، د ککړتیا د مخنیوي، د ځنګلونو د اهمیت او ساتنې، د شنو ساحو د پراختیا او ارزښت په اړه اړین معلومات وړاندې شول. د ملګرو ملتونو د پراختیايي ادارې ولایتي مسئول د پروژې د تطبیق څرنګوالي په اړه د ترتیب شوي پریزنټېشن له لارې مفصل معلومات له ګډونوالو سره شریک کړل.
د غونډې په جریان کې د اکسس پواینټ شرکت مسئولینو د خپلې برخې اړوند هغه فعالیتونه تشریح کړل چې د شیګل ولسوالۍ کې یې ترسره کړي دي. د سید جمال‌الدین افغان پوهنتون استاد هم د چاپېریال ساتنې، د ځنګلونو د ارزښت، د اقلیمي بدلونونو سره د مبارزې او د نیالګیو کېنولو په برخه کې د پوره همکارۍ ډاډ څرګند کړ.

همدارنګه، د غونډې په ترڅ کې د عامه پوهاوي پر ارزښت ځانګړی ټینګار وشو. د ټولو ادارو استازو او مسئولینو د عامه پوهاوي د پراخولو، د خلکو د ذهنيت جوړونې او د چاپېریال ساتنې فرهنګ د پیاوړتیا په برخه کې د ګډ کار او همغږۍ پر اړتیا ټینګار وکړ، او دا یې د پروژې د بریالیتوب مهم اصل وباله.
قومي مشرانو د پروژې د تطبیق هرکلی وکړ، د لا زیاتو پراختیايي پروژو غوښتنه یې وکړه او له اړوندو مسئولینو سره یې د بشپړې همکارۍ ژمنه وکړه.
د غونډې په پای کې د ګډونوالو پوښتنو ته په دقت او قناعت بښونکي ډول ځوابونه ورکړل شول او غونډه په دعا سره پای ته ورسېده.

Feb 19, 2026