میدان وردګو کې د نیالګیو کېنولو په تړاو د همغږۍ غونډه وشوه

۱۴۴۷ کال د رمضان ۹مه نېټه/میدان وردګ
د (۱۴۰۵) ل کال د نیالګیو کېنولو ملي کمپاین په تړاو د میدان وردګو والي الحاج ملا خیرالله خیرخواه په مشرۍ تېره ورځ د ولایت مقام د غونډو په تالار کې د امارتي ادارو او مؤسساتو له استازو سره د همکارۍ او همغږۍ غونډه وشوه.
 یاده غونډه د میدان وردګو ولایت د چاپېریال ساتنې ریاست له لوري جوړه شوې وه چې موخه یې د اړوندو امارتي ادارو په ګډه همکارۍ او همغږۍ د نیالګیو کېنولو پروسې تنظیم او لازم چمتووالی دی.
 غونډه د قرانکریم د څو مبارکو ایتونو په تلاوت پیل شوه ورپسې د میدان وردګو والي الحاج ملاخیرالله خیرخواه د نیالګینو د کینولو، ساتنې او پالنې په اړه هر اړخیزه وینا وکړه، نوموړي د ولایتي ادارو ترمنځ د نیالګیو د کېنولو د همغږۍ او چمتووالي په غونډه کې ټینګار وکړ چې د ادارو مسؤلین باید د ډېرو نیالګیو د کېنولو پر ځای د هغوی پالنې، ساتنې او اوبو رسولو ته جدي پاملرنه وکړي.

ښاغلي خیرخواه د ارشاد، حج او اوقافو، علماؤ شورا، اطلاعاتو او فرهنګ او ملي راډیو تلویزیون له مسؤلینو وغوښتل چې د اسلام او ساینس له نظره د نیالګیو د ارزښت په اړه عامه پوهاوی زیات کړي؛ ترڅو خلک د زرغون چاپېریال په ارزښت پوه شي.
د میدان وردګو والي د دولتي ادارو مسؤلینو او مؤسساتو استازو ته سپارښتنه وکړه چې د نیالګیو د کېنولو په ملي کمپاین او د چاپېریال په زرغونتیا کې له اړوندو ادارو سره همکاري وکړي؛  ترڅو راتلونکی نسل یو پاک او زرغون چاپېریال ولري.

همداراز د میدان وردګو ولایت د چاپیریال ساتنې رئیس مولوي الله محمد ذاکر د نیالګیو د کینولو په اړه ګډونوالو ته معلومات ورکړل او جوړ شوی عملیاتي پلان یې له ګډونوالو سره شریک کړ. نوموړي له ګډونوالو غوښتنه وکړه چې د نیالګیو کېنولو په کمپاین کې د چاپېریال ساتنې ریاست سره همکاري وکړي او خپل کارمندان وهڅوي؛ ترڅو یو یو نیالګی د هیواد د ښیرازۍ او زرغونتیا لپاره وکري، په ورته مهال کې د چاپېریال ساتنې ریاست  د اطلاعاتو او عامه پوهاوي عمومي مدیر عزیزالله سعادت له لوري د اسلام او ساینس له نظره د نیالګیو د ارزښت، د ولایتي کمېټې د مسؤلیتونو، او د نیالګیو د پالنې او ساتنې په اړه هر اړخیز معلوماتي پرېزنټېشن وړاندې کړ.

دغه راز د اړوندو ادارو مسؤلینو، پانګوالو او مؤسساتو استازو ژمنه وکړه چې د نیالګیو د کېنولو ملي کمپاین کې به په ټول ولایت کې زرګونه  میوه لرونکي او زینتي نیالګي او بوټي کېنوي. همدارنګه، د غونډې ګډونوالو د غرنیو سیمو د ځنګلونو ساتنې، د نیالګیو د پالنې، او د هغوی د اوبو رسولو پر اړتیا ټینګار وکړ او اړوند ادارو ته یې د چمتووالي سپارښتنې وکړې.

Feb 26, 2026