د چاپېریال ساتنې ملي ادارې عمومي رئیس د ترکیې هېواد له شارژدافیر سره وکتل

۱۴۴۷کال د رمضان ۱۳مه نېټه/ کابل
د چاپېریال ساتنې ملي ادارې عمومي رئیس الحاج مولوي مطیع الحق خالص نن دوشنبه د ۱۴۰۴کال د کب په ۱۱مه نېټه په کابل کې د ترکیې د سفارت له شارژدافیر او د ماموریت مشر ښاغلي سادین اییلدیز سره په خپل کاري دفتر کې وکتل.
په پیل کې د چاپېریال ساتنې ملي ادارې عمومي رئیس د ترکیې شارژدافیر هرکلی وکړ او د نوې دندې مبارکي یې ورکړه.
په دې کتنه کې د افغانستان او سیمې پر فعلي وضعیت، مختلفو چاپېریالي مسایلو او اقلیمي بدلون په تړاو یې هر اړخیز بحث او خبرې وشوې.

د چاپېریال ساتنې ملي ادارې عمومي رئيس غوښتنه وکړه چې د ترکېې هېواد سره په ګډو همکاریو مخکې قدمونه واخلي. نوموړي وویل: د ظرفیت لوړونې، نړۍوالو چاپېریالي پروژو کې د افغانستان د ونډې، له اقلیمي بدلون سره د سازښت او مبارزې، د ځنګلونو او او وحشي ژوو د ساتنې، په چاپېریالي برخو کې د نوې ټکنالوژۍ او تجهیزاتو، نړیوالو چاپېریالي کنفرانسونو او همداراز په سیمه‌ییزو غونډو کې د افغان پلاوي ګډون لپاره د ترکیې همکاري اړینه ده.

عمومي رئیس د ترکیې له سفیر څخه وغوښتل چې په ترکیه کې د (COP-31) نړۍوال کنفرانس کې دې د افغانانو لپاره د ګډون زمینه مساعده کړي؛ ترڅو وکولی شو خپلې چاپېریالي ستونزې تر نړۍوالو ورسوو او په دې برخه کې لازم اقدامات ترسره شي.
ښاغلي خالص ټینګار وکړ چې چاپېریالي مسایل باید سیاسي نه شي؛ ځکه ولسونه ترې زیانمن کیږي، دا بشري موضوعات دي او باید له سياست څخه جلا شي.
په کابل کې د ترکیې د سفارت شارژدافیر او د ماموریت مشر ښاغلي سادین اییلدیز د چاپېریال ساتنې ملي ادارې عمومي رئیس څخه د ملاقات د زمینې برابرولو له امله مننه وکړه. نوموړي په خپلو خبرو کې وویل: د چاپېریال ساتنې په برخه کې نړۍوال د افغانستان ډیر پوروړي دي؛ ځکه افغانستان د اقلیمي بدلون د ناوړه اغېزو څخه ډیر زیانمن هېواد دی، اقلیمي بدلون یوه نړۍواله موضوع ده چې په رامنځته کیدو کې یې ډیر رول پرمختللي هېوادونه لري او هغوی باید خپل مسوولیتونه په سمه توګه ترسره کړي.

نوموړي وویل چې موږ چمتو یو په دې برخه کې خپلې تجربې له افغانانو سره شریکې کړو، ده وویل موږ به ستاسو غوښتنې له خپل هېواد سره شریکې کړو او هڅه به مو دا وي چې څنګه وکولی شو له اقلیمي بدلون سره د سازښت په برخه کې خپلې تجربې، مشورې او مشترکې همکارۍ ته دوام ورکړو.
د ترکیې شارژدافیر ژمنه وکړه چې د دوست هېواد په توګه به هغه څه وکړو چې په وس کې مو دي.

Mar 3, 2026