وروستی
د چاپېریال ساتنې ملي ادارې او TLO موسسې ترمنځ د ۱۴۲٠٠٠ زره امریکايي ډالرو په ارزښت د پروژې هوکړهلیک لاسلیک شو
۱٤٤٧کال د رمضانالمبارک ١٦مه/ کابل
د چاپېریال ساتنې ملي ادارې او د
(TLO) موسسې ترمنځ د ۱۴۲۰۰۰ امریکايي ډالرو په ارزښت د یوې
چاپېریالي پروژې هوکړهلیک لاسلیک شو. دغه هوکړهلیک د چاپېریال ساتنې ملي ادارې
عمومي رئیس الحاج مولوي مطیعالحق خالص او د
TLO موسسې مرستیال انجنیر عبدالرحیم خرم ترمنځ لاسلیک
شو.
د یادې پروژې موخه د چاپېریال ساتنې په برخه کې د عامه
پوهاوي لوړول، د ځوانانو او ټولنې د ګډون پیاوړتیا، د اقلیم بدلون په اړه د ظرفیت
لوړونه او د طبیعي سرچینو ساتنه ده.
همداراز د دې پروژې په چوکاټ کې به یو لړ مهم فعالیتونه
ترسره شي، په کابل ښار کې د “زرغون میراث” تر سرلیک لاندې د نیالګیو کېنولو ملي
کمپاین افتتاحیه پروګرام او په ښوونځیو او انستیتوتونو کې د نیالګیو کېنولو کمپاین
دی، چې پکې به شاوخوا ۲۰۰۰
د وچکالۍ پر وړاندې مقاومت لرونکي نیالګي کېنول شي.
همدارنګه به په کابل ښار کې د چاپېریالي پوهاوي ورزشي پروګرام
هم د ځوانانو او اړوندو بنسټونو په ګډون ترسره شي.
په دې پروژه کې د اقلیم بدلون، د طبیعي سرچینو ساتنې او د ښاري
چاپېریال په برخو کې د ظرفیت لوړونې روزنیز پروګرامونه هم شامل دي چې په کابل، پکتیکا،
بدخشان او لوګر ولایتونو کې به ترسره شي.
سربېره پر دې د چاپېریال ساتنې رضاکارانو، محصلینو او
فعالانو لپاره څلور ورځنی روزنیز ورکشاپ هم په پلان کې شوی دی.
د پروژې په نورو فعالیتونو کې د چاپېریال او اقلیم بدلون د
همغږۍ پلاتفورم (CECOP) د
غونډو ترسره کول، د اقلیم بدلون د اغېزو په اړه د معلوماتي مستند ویډیو جوړول، په
کابل ښار کې د چاپېریالي پیغامونو لرونکي دیوالیز انځورونه رسمول، د چاپېریالي
بروشورونو چاپ او وېش او د اقلیم بدلون په اړه مشورتي غونډه هم شاملې دي.
دغه راز د دې پروژې په ترڅ کې به د چاپېریالي راپور ورکولو
په برخه کې د خبریالانو د ظرفیت لوړونې روزنیز پروګرامونه ترسره شي او د کابل ښار
د ښاري پراختیا او د ښارنشینۍ د چاپېریالي اغېزو په اړه به یوه څېړنه هم ترسره او
پایلې به یې د چاپېریال ساتنې ملي ادارې سره شریکې شي.
د چاپېریال ساتنې ملي ادارې عمومي رئیس الحاج مولوي مطیعالحق
خالص د یاد هوکړهلیک د لاسلیک پر مهال وویل د چاپېریال ساتنې په برخه کې ګډې هڅې
او همغږي د دوامدارو پایلو د ترلاسه کولو لپاره ډېر ارزښت لري.
نوموړي ټینګار وکړ چې دا پروژه به د اقلیمي بدلون د اغېزو د
کمولو، د چاپېریالي پوهاوي د پراختیا او د ټولنې د فعال ګډون په پیاوړتیا کې مهم
رول ولوبوي او هیله یې وښوده چې اړوند بنسټونه به د پروژې د غوره او اغېزمن تطبیق
لپاره جدي همکاري وکړي.
په همدې حال کې د
TLO موسسې مرستیال انجنیر عبدالرحیم خرم هم د پروژې
د تطبیق په برخه کې د خپلې موسسې ژمنتیا څرګنده کړه او ویې ویل چې یاد بنسټ به د
چاپېریال ساتنې ملي ادارې سره په نږدې همغږۍ د پروژې د ټولو فعالیتونو د اغېزمن
تطبیق لپاره کار وکړي. نوموړي همدارنګه د چاپېریال ساتنې په برخه کې د ګډو همکاریو
د پیاوړتیا او د چاپېریالي پوهاوي د پراختیا پر دوام ټینګار وکړ.