د چاپېریال ساتنې ملي ادارې له لوري کابل کې د نیالګیو کېنولو ملي کمپاین پیل شو

١٤٤٧کال د رمضان المبارک ۲۱مه/ کابل
د چاپېریال ساتنې ملي ادارې له لوري د TLOموسسې په همکارۍ د کابل دارالامان اړوند قلعه مسلم تپه کې د نیالګیو کېنولو ملي کمپاین پیل شو. په دې مراسمو کې لوړ پوړو امارتي چارواکو، د ملي، نړۍوالو مؤسسو او یوناما استازو، د سیمې مشرانو، ځوانانو، محصلینو او د رسینو استازو ګډون کړی و.

غونډه د قران عظیم الشان مبارکو آیتونو په تلاوت پیل شوه ورپسې د ټیلو مؤسسې مرستیال انجنیر عبدالرحیم خرم د ګدونوالو هرکلی وکړ او ژمنه یې وکړه چې د اقلیمي بدلون ناوړه اغېزو راکمولو او د هېواد د ښېرازۍ په موخه به سږني پسرلي کې مرکز او ولایتونو کې ۴نیم سوه زره نیالګي کېنوي.

د چاپېریال ساتنې ملي ادارې عمومي رئیس الحاج مولوي مطیع الحق خالص په خپلو خبرو کې وویل: د خوښۍ ځای دی چې ولس، امارتي ادارې، ملي او نړۍوالې مؤسسې دې ته لېواله دي څو د وطن په ابادۍ او سمسورتیا کې برخه اخلي.

نوموړي د ونو او بوټو د اهمیت په هکله هر اړخیزه وینا وکړه او زیاته یې کړه چې زموږ چاپېریالي اړخ د تېرو تپل شوو جګړو له امله ډیر زیانمن شوی او د ژواندانه اساسي بنسټونه مو سخت زیانمن شوي دي. ده زیاته

کړه: ونې طبیعي فلتر دي چې الله تعالی موږ ته اهدا کړي دي او دا د ښېرازۍ، سمسورتیا، د تودوخې درجې کنټرول او اقلیمي اغېزو راکمولو لپاره تر ټولو اسانه او لنډه لاره ده چې موږ نیالګي کېنوو او ځمکه شنه کړو.

عمومي رئیس زیاته کړه چې سږ کال د افغانستان په سطحه لس میلیونه نیالګي هدف ټاکل شوی دی او موږ هڅه کوو چې دا هدف لوړ کړو.

ښاغلي خالص ټینګار وکړ چې موږ باید په ګډه شریک قدمونه واخلو، د افغانستان سمسورتیا د ټول ولس، حکومت، ملي او نړۍوالو بنسټونو ګډ مسوولیت دی. ده همداراز له ټولو وغوښتل چې د نیالګیو د کېنولو ترڅنګ یې باید ساتنې او پالنې ته هم جدي پاملرنه وشي.

عمومي رئیس زیاته کړه چې زموږ اقتصادي او صنعتي پرمختګ باید اصولي وي او هېوادوالو ته باید زیان و نه رسیږي. نوموړي له امارتي ادارو، خصوصي سکتور او هېوادوالو وغوښتل چې د هواککړتیا راکمولو او مخنيوي کې باید له دې ادارې سره همکاري وکړي او پر صنعت کارانو یې غږ وکړ چې خپل فعالیتونه دې د چاپېریالي اصولو او مقرراتو مطابق عیار او ترسره کړي.

د مراسمو په لړ کې د کابل ښاروالۍ د زرغونتیا رئیس مولوي عبدالوکیل متوکل د اسلام له نظره د نیالګیو د اهمیت په هکله خبرې وکړې او زیاته یې کړه چې سږ کال به د کابل ښار په مختلفو سیمو کې یو میلیون نیالګي کېنوي چې د ساتنې او پالنې په برخه کې یې باید کابل ښاریان جدي همکاري وکړي.

همدا راز په افغانستان کې د یوناما دفتر په استازیتوب آغلې ارزو خبرې وکړې او د هېواد په کچه یې د نیالګیو کېنولو پروګرامونه وستایل. نوموړې په خپلو خبرو کې وویل چې د لسګونو کلونو جګړې او ناپلانه ښاري ودې افغانستان ته ډیرې چاپېریالي ستونزې پیداکړې دي چې د نورو اقداماتو ترڅنګ یې د نیالګیو کېنول هم مثبته او اغېزمنه لاره ده.

له غونډې وروسته رسما کمپاین پرانیستل شو او نیالګي کېنول شول.

Mar 11, 2026