وروستی
پکتیکا کې د نیالګیو کېنولو ملي کمپاین پیل شو
۱۴۴۷ کال د رمضان المبارک ۲۲مه نېټه/ پکتیکا
د نیالګیو کېنولو ملي کمپاین په درشل کې د روان ۱۴۰۴کال د کب په ۱۸مه نېټه د پکتیکا ولایت د چاپېریال
ساتنې رياست له لوري (د ځمکې ابادول د پېغمبر صلی الله علیه وسلم سنت دی) تر شعار
لاندې د نیالګیو کېنولو ملي کمپاین د یو لړ مراسمو په ترڅ کې رسماً پیل شو.
دغه مراسم چې د تخنیکي او مسلکي زدهکړو انستیتوت په انګړ کې
جوړ شوي وو، د پکتیکا محترم والي او اړوندو امارتي ادارو رئیسانو او استازو ګډون کړی
وو.
په پیل کې د پکتیکا والي مولوي عبدالخالق عابد د نیالګیو د
اهمیت او ساتنې په هکله خبرې وکړې، له خلکو وغوښتل چې نيالګي کېنوي او د هېواد په
سمسورتيا کې فعاله ونډه واخلي؛ ترڅو مو هېواد سرسبزه او زرغون شي.
همداراز د پکتیکا ولایت د چاپېریال ساتنې رئیس مولوي محمد
سجاد خان وقاص په غونډه کې ولسونو ته پیغام ورکړ او غوښتنه یې ترې وکړه چې د پسرلي
موسم په رارسېدو سره د نیالګیو کېنولو ته جدي پاملرنه وکړي.
نوموړي
ټینګار وکړ چې نیالګي دې په جوماتونو، د سړکونو په غاړو، ښوونځیو، انسټیټیوټونو،
پوهنتونونو او نورو عامه ځایونو کې کېنول شي او تر څنګ یې د نیالګیو ساتنه او
پالنه هم په ښه ډول ترسره شي؛ ترڅو راتلونکو نسلونو ته سالم او شین چاپېریال پرېښودل
شي.
د مراسمو په لړ کې د چارواکو او امارتي ادارو مسوولینو له
لوري د پکتیکا تخنیکي او مسلکي زدهکړو انستیتوت په انګړ کې نیالګي کېنول شول چې
دغه عملي اقدام د چاپېریال ساتنې د ارزښت او
شنهوالي د ودې په برخه کې د حکومتي ادارو ژمنتیا څرګندوي.
په پای کې ګډونوالو د نیالګیو کېنولو دا کمپاين د چاپېریال
ساتنې او عامه پوهاوي په برخه کې مهم وباله او ژمنه یې وکړه چې د شنهوالي د پراختیا،
د ځنګلونو ساتنې او د اقلیم بدلون د منفي اغېزو د کمولو په موخه به خپلو هڅو ته
دوام ورکوي.