وروستی
په پکتیا ولایت کې د نیالګیو کېنولو ملي کمپاین پیل شو
١٤٤٧کال د رمضانالمبارک ٢٢مه/ پکتیا
د پکتیا ولایت د چاپېریال ساتنې ریاست له لوري په ګردېز ښار
کې د نیالګیو کېنولو ملي کمپاین د یوې رسمي غونډې او عمومي حشر په ترسره کېدو سره
پیل شو.
دا پروګرام د ګردېز ښار د تېرې کوتل په سیمه کې د «د ځمکې بیا
احيا د پیغمبر صلی الله علیه وسلم سنت دی» تر شعار لاندې ترسره شو.
په دې مراسمو کې د پکتیا مرستیال والي شیخ انعام الله صلاح
الدین، د چاپېریال ساتنې رئيس مولوی عبدالهادي هدایت، د کرنې رئیس مولوي سید امین
هاشمي او د علماوو شورا رئیس شیخ صالح محمد فقیر ویناوې وکړې. ویناوالو د ونو کېنولو،
د اوبو د ساتنې او د پاک چاپېریال د ارزښت په اړه خبرې وکړې او له خلکو یې وغوښتل
چې د نیالګیو کېنولو تر څنګ د هغوی ساتنې ته هم جدي پاملرنه وکړي.
د پکتیا د چاپېریال ساتنې ریاست د معلوماتو له مخې، د یاد
کمپاین په ترڅ کې به د ولایت په بېلابېلو سیمو کې شاوخوا ۳۰۰ زره مثمر او غیر مثمر نیالګي
کېنول شي.
د غونډې په پای کې د تېرې کوتل په ټاکل شوې سیمه کې د
چارواکو او ګډونوالو له لوري د نیالګیو کېنولو کمپاین رسماً پیل شو.
