عمومي رئیس: لکه څنګه چې افغانانو د هېواد د ازادۍ په ترلاسه کولو کې مهمه ونډه اخیستې، همداسې باید د وطن د ابادۍ او سمسورتیا لپاره هم خپل مسوولیت ادا کړي.

١٤٤٧کال د رمضان‌المبارک ٢٦مه/ کابل
د چاپېریال ساتنې ملي ادارې عمومي رئیس الحاج مولوي مطیع‌الحق خالص دغه څرګندونې د کابل ولایت د تنګي غارو په سیمه کې د نیالګیو کېنولو ملي کمپاین د دوام په مناسبت جوړې شوې غونډې ته د وینا پر مهال وکړې، چې پکې د امارتي ادارو مسوولینو، ولسي مشرانو او د سیمې اوسېدونکو ګډون کړی و.
غونډه د قرآن کریم د مبارکو آیتونو په تلاوت پیل شوه. وروسته د FGA همکاري موسسې د پروګرامونو مسوول ډاکټر نعمت الله رحیمي د ښه راغلاست وینا وکړه او ویې ویل چې د یاد کمپاین په ترڅ کې به د دې سیمې د شنه کمربند د پیاوړتیا لپاره شاوخوا ۳۰۰۰ د بادامو نیالګي کېنول شي، څو د سیمې زرغونتیا زیاته او د چاپېریال ساتنې په برخه کې مثبت بدلون رامنځته شي.

ورپسې د چاپېریال ساتنې ملي ادارې عمومي رئیس الحاج مولوي مطیع‌الحق خالص غونډې ته مفصله وینا وکړه. نوموړي د افغانانو د جهاد او مقاومت ستاینه وکړه او زیاته یې کړه چې افغانانو د اوږدې مبارزې وروسته د خپل هېواد ازادي ترلاسه کړه نو اوس د ټولو ګډ مسوولیت دی چې د هېواد د بیا رغونې، پرمختګ او زرغونتیا لپاره هڅې وکړي.

هغه له ولسونو وغوښتل چې د نیالګیو په کېنولو او ساتنې کې فعاله ونډه واخلي، ځکه د نیالګیو کېنول نه یوازې د چاپېریال د ساتنې لپاره مهم دي، بلکې د هوا د ککړتیا کمولو، د خاورې د تخریب مخنیوي، د اقلیمي بدلون د منفي پایلو سره د مبارزې او د طبیعي ښکلا د زیاتوالي لپاره هم ځانګړی ارزښت لري.

ښاغلي خالص د چاپېریال ساتنې ملي ادارې د تېر کال د لاسته راوړنو یادونه هم وکړه او ویې ویل چې دغه اداره هڅه کوي د هېواد په بېلابېلو ولایتونو کې د زرغونتیا پروګرامونه پیاوړي کړي او د نیالګیو کېنولو ملي کمپاین نور هم پراخ کړي.

ده زیاته کړه تېر کال دې ادارې ٨ میلیونه نیالګي کېنول هدف ټاکلی و چې له نېکمرغه د همکارو او مرستندویه موسساتو او بنسټونو په همکارۍ ١٧ میلیونه نیالګي کېنول شول؛ دغه راز سږکال شاوخوا لس میلیونه نیالګي هدف ټاکل شوی او کیدای شي چې تر دې هدف زیات نیالګي په ټول هېواد کې کېنول شي.

په غونډه کې د کابل ښاروالۍ د زرغونتیا ریاست مرستیال مولوي محمد شاه همت او د ولسي مشرانو په استازیتوب ملک سرور هم ویناوې وکړې. هغوی د چاپېریال ساتنې د هڅو ملاتړ وکړ او ژمنه یې وکړه چې د نیالګیو د کېنولو تر څنګ به د هغوی د ساتنې او پالنې لپاره هم جدي هڅې کوي.
غونډه د هېواد د ښېرازۍ او سمسورتیا په هیله د نیالګیو په کېنولو پای ته ورسېده، چې پکې د یادو ادارو مسوولینو، ولسي مشرانو او د سیمې اوسېدونکو برخه واخیستې وه.

Mar 16, 2026