د چاپېریال ساتنې ملي ادارې عمومي رئیس د روشن مخابراتي شرکت له مسوولینو سره وکتل

١٤٤٧کال د شوال ١٨مه/ کابل
د چاپېریال ساتنې ملي ادارې عمومي رئیس الحاج مولوي مطیع‌الحق خالص د روشن مخابراتي شرکت له مرستیال سید عزت الله هاشمي او ورسره پلاوي سره په خپل کاري دفتر کې وکتل.
په دې کتنه کې د چاپېریال ساتنې، د شنو ساحو پراختیا، د نیالګیو کېنولو پروګرامونو او د عامه پوهاوي د لوړولو په برخو کې د ګډو همکاریو پر پراختیا خبرې وشوې. دواړو لورو د چاپېریال ساتنې په برخه کې د خصوصي سکتور ونډه مهمه وبلله او ټینګار یې وکړ چې د دوامدارو او اغېزمنو پروګرامونو پلي کېدو لپاره همغږي او ګډ کار اړین دی.

د چاپېریال ساتنې ملي ادارې عمومي رئیس وویل چې د چاپېریال ساتنه یوازې د دولتي ادارو مسوولیت نه دی، بلکې خصوصي سکتور، ټولنیز بنسټونه او عام خلک هم پکې مهم رول لري. نوموړي د روشن مخابراتي شرکت له دوامداره همکاریو مننه وکړه او هیله یې وښوده چې دغه همکاري به لا پیاوړې شي.

بل لور ته د روشن مخابراتي شرکت مرستیال د چاپېریال ساتنې په برخه کې د خپلو فعالیتونو په اړه معلومات وړاندې کړل او ژمنه یې وکړه چې په راتلونکې کې به هم د نیالګیو کېنولو او د چاپېریال ساتنې اړوند پروګرامونو کې فعاله ونډه واخلي.

Apr 6, 2026