وروستی
لغمان کې د طبي پاتې شونو د تنظیم په پار مشورتي غونډه وشوه
۱۴۴۷ کال
د شوال۲۹نېټه/
لغمان
د لغمان ولایت د چاپېریال ساتنې ریاست له لوري د طبي پاتې
شونو د تنظیم او مدیریت په موخه د مهترلام ښار د روغتیایي مرکزونو د اتحادیې له
مشرانو او د یاسر عمر مشرقیوال په نوم د طبي کثافاتو تنظیفي او خدماتي شرکت له
مسؤلینو سره مشورتي غونډه وکړه، یاده ناسته په خوندي ډول د طبي زبالو د انتقال او
په معیاري توګه د طبي کثافاتو د له منځه وړلو په موخه جوړه شوې وه.
په دې غونډه کې د طبي زبالو د تنظیم، مدیریت او په معیاري ډول
د روغتیایي او کلینیکي پاتې شونو د له منځه وړلو طرحه له ګډونوالو سره شریکه شوه،
هر اړخیز بحث او خبرې پرې وشوې.
د روغتیايي مرکزونو د اتحادیې مشرانو د طبي کثافاتو د معیاري
له منځه وړلو له دې طرحې څخه خوښي وښوده او ویې ویل چې د مناسب فیس په بدل کې دې د
طبي پاتې شونو د انتقال یوه شرکت سره قرارداد وشي؛ ترڅو طبي کثافات په سمه او معیاري
توګه تنظیم او مدیریت شي.
د لغمان ولایت د چاپېریال ساتنې ریاست مسوولینو د طبي
کثافاتو د زیانونو په اړه معلومات وړاندې کړل او د طبي پاتې شونو د تنظیم مقررې له
مخې یې د قراردادي شرکت مسؤلینو ته یو شمېر سپارښتنې وکړې.
د غونډې په پای کې د طبي کثافاتو د انتقال قراردادي شرکت
مسؤل محمد یاسر عمر د خپل شرکت د فعالیتونو په اړه معلومات ورکړل او د چاپېریال
ساتنې ریاست له کارکوونکو سره یې د همکارۍ ډاډ څرګند کړ.
د یادونې وړ ده چې د یاسر عمر مشرقیوال په نوم د طبي
کثافاتو تنظیفي او خدماتي شرکت په ننګرهار ولایت کې فعالیت لري او غواړي چې د
لغمان ولایت طبي پاتې شوني راټول او د روغتیايي مرکزونو څخه د میاشتني فیس په بدل
کې یې په مصؤن ډول انتقال او په معیاري توګه له منځه یوسي.