وروستی
سیمهییزه ایکولوژیکي سرمشریزه په آستانه کې د افغانستان ا.ا.ا د پلاوي په ګډون سره پیل شوه
١٤٤٧کال د ذوالقعدې ٥مه/ آستانه
د قزاقستان په پلازمېنه آستانه کې نن د سیمهییزې ایکولوژیکي
سرمشریزې (Regional Ecological Summit 2026) پرانیستغونډه
ترسره شوه چې پکې د سیمې د یو شمېر هېوادونو ولسمشرانو، لوړپوړو دولتي چارواکو، د
ملګرو ملتونو استازو، نړیوالو بنسټونو او د چاپېریال ساتنې متخصصینو ګډون کړی و.
په دې سرمشریزه کې د افغانستان اسلامي امارت د چاپېریال
ساتنې ادارې عمومي رئیس الحاج مولوي مطیعالحق خالص هم د یوه رسمي پلاوي په مشرۍ ګډون
کړی دی.
غونډه د کوربه هېواد د ولسمشر د پرانیستونکې وینا په ترڅ کې
پیل شوه، چې پکې یې د اقلیمي بدلون پر وړاندې د ګډو او همغږو اقداماتو پر اړتیا یي
ټینګار وکړ او ویې ویل چې د چاپېریالي ننګونو اغېزې له پولو هاخوا دي او د حل
لپاره یې سیمهییزه او نړیواله همکاري حیاتي ارزښت لري.
ورپسې د ګډونوالو هېوادونو یو شمېر مشرانو او استازو په
خپلو ویناوو کې د اقلیمي بدلون د اغېزو، د اوبو د کمښت، د ځنګلونو د تخریب، د هوا
د ککړتیا او د طبیعي سرچینو د ناسم مدیریت پر ستونزو خبرې وکړې او د ګډو حللارو
پر موندلو یې ټینګار وکړ.
د ملګرو ملتونو استازو هم په خپلو څرګندونو کې د اقلیم
بدلون د نړیوال ګواښ په توګه یاد کړ او له هېوادونو یې وغوښتل چې د چاپېریال ساتنې
په برخه کې خپلې ژمنې پیاوړې او عملي کړي.
د غونډې په لومړۍ ورځ پر دې ټینګار وشو چې د زرغون اقتصاد
پراختیا، د نوې ټکنالوژۍ کارونه، د طبیعي سرچینو دوامداره مدیریت او د سیمهییزو
همکاریو پیاوړتیا کولای شي د اقلیمي بدلون د اغېزو په کمولو کې مهم رول ولوبوي.
د اسلامي امارت د پلاوي د ګډون موخه په دې سرمشریزه کې د
افغانستان د چاپېریالي وضعیت او اړتیاوو مطرح کول، له نړیوالو شریکانو سره د تجربو
تبادله او د اقلیمي خطرونو د کمولو لپاره د همکاریو پراخول دي.
ټاکل شوې ده چې د سرمشریزې په راتلونکو ورځو کې به تخنیکي
ناستې، دوهاړخیزې لیدنې او تخصصي بحثونه هم ترسره شي، چې پکې به د اقلیمي بدلون
پر وړاندې عملي او دوامدارې حللارې وڅېړل شي.
دا سرمشریزه د اقلیمي بدلون پر وړاندې د سیمهییزې همغږۍ د
پیاوړتیا لپاره یو مهم ګام بلل کیږي، چې کولی شي د سیمې د هېوادونو ترمنځ د ګډو
اقداماتو او مؤثرو همکاریو لپاره لا پیاوړې زمینه برابره کړي.