وروستی
د نیالګیو کېنولو ملي کمپاین پر دوام د کابل مختلفو سیمو کې ۱۰۰۰نیالګي کېنول شول
۱۴۴۷کال د ذوالقعدې ۶مه/ کابل
د سمسورتیا د پراخیتا، پاک او شین چاپېریال رامنځته کولو په
پار د ۱۴۰۵کال
د نیالګیو کېنولو ملي کمپاین پر دوام د چاپېریال ساتنې عمومي ادارې له لوري د
افغان بیسیم مخابراتي شرکت په همکارۍ؛ د ټرانسپورت، هوانوردۍ وزارت او ملي راډیو
تلویزیون په همغږۍ د کابل په ارغندي کې د نوي جوړ شوي ترمینل او ملي راډیو تلویزیون
انګړ کې ۱۰۰۰نیالګي
کېنول شول.
په همدې مناسبت د چاپېریال ساتنې عمومي ادارې د کول حشمت
خان غونډو په تالار کې نن پنج شنبه د ۱۴۰۵کال
د ثور میاشتې په ۳مه
نېټه مراسم جوړ شوي وو چې پکې د امارتي ادارو او افغانبیسیم مخابراتي شرکت مسوولینو
ګډون کړی وو.
د نیالګیو
کېنولو دغه مراسم د قران عظیم الشان مبارکو آیتونو په تلاوت پیل ورپسې د چاپېریال
ساتنې عمومي ادارې مالي او اداري مرستیال مولوي سعدالدین سعید ګډونوالو ته ښه
راغلاست ووایه او خوښي یې څرګنده کړه چې د سمسورتیا پر لور ګام اخلو. نوموړي وویل:
په ظاهر کې دنیالګیو کېنول عادي کار دی: خو په حقیقت کې دا یو لوی کار دی چې ګټې یې
بېحسابه دي.
ښاغلي سعید ټینګار وکړ چې چاپېریال ساتنه د یوې ادارې مسوولیت
نه، بلکې د ټول بشر مسوولیت دی. ده د افغان بیسیم مخابراتي شرکت څخه مننه وکړه چې
د هېواد په سمسورتیا کې یې برخه واخیسته.
د چاپېریال ساتنې عمومي ادارې مالي او اداري مرستیال پر هېوادوالو
غږ وکړ چې په چاپېریال ساتنه او د هېواد په سمسورتیا کې برخه واخلي.
د مراسمو په لړ کې د ټرانسپورټ او هوایي چلند وزارت؛ ملي راډیو
تلویزیون او افغان بیسیم مخابراتي شرکت استازو خبرې وکړې او چاپېریال ساتنې یې د ټولو
هېوادوالو ګډ مسوولیت وباله.
د افغان بیسیم مخابراتي شرکت د حقوقي چارو رئیس محمدي خان یعقوبي
په خپلو خبرو کې وویل چې چاپېریال ساتنه د ژوند له اساسي اړتیاوو څخه ده. نوموړي
خوښي څرګنده کړه چې د ا.ا.ا سره څنګ په څنګ د سمسورتیا په برخه کې همکاري کوي. ښاغلي
یعقوبي وویل: موږ ویاړو چې د چاپېریال ساتنې برخه کې همکاري کوو.
د یادونې وړ ده چې د افغان بیسیم مخابراتي شرکت له لوري د ۱۴۰۵کال د نیالګیو کېنولو ملي
کمپاین په درشل کې د کابل په شمول کندهار، خوست، بامیان او بلخ ولایتونو کې ۵۲۰۰نیالګي کېنول شوي دي.