وروستی
د طبي کثافاتو د خوندي انتقال او له منځه وړلو لپاره د روغتیايي مرکزونو د ثبت بهیر پیل شو
۱۴۴۷ کال د ذوالقعدې۹نېټه/ لغمان
د لغمان ولایت د چاپېریال ساتنې ریاست د نظارت او تفتیش ټیم،
د یاسر عمر مشرقیوال د طبي کثافاتو خدماتي شرکت له کارکوونکو سره په ګډه، د ولایت
په کچه د روغتیايي مرکزونو د ثبت پروسه پیل کړه. د دې کار هدف دا دی چې طبي کثافات
په خوندي ډول راټول، انتقال او په معیاري ډول له منځه یوړل شي.
په لغمان ولایت کې شاوخوا ۲۵۰ خصوصي روغتیايي مرکزونه فعالیت
لري، چې پکې کلینیکونه، یو روغتون، د غاښونو کلینیکونه، لابراتوارونه او
درملتونونه شامل دي. دا ټول مرکزونه به د ټاکلي میاشتني فیس په بدل کې له یاد شرکت
سره ثبت شي.
د شرکت کارکوونکي به په اونۍ کې دوه ځله د دغو مرکزونو طبي
کثافات راټولوي او په خوندي او معیاري ډول به یې له منځه وړي.
همدارنګه، د هرې راټولونې په اړه به د طبي زبالې د مقررې له
مخې منظم او مستند راپور د لغمان د چاپېریال ساتنې ریاست ته وړاندې کوي.