وروستی
لغمان کې د طبي کثافاتو د راټولولو شرکت پرانېست غونډه وشوه
۱۴۴۷ کال د ذوالقعدې۱۱نېټه/ لغمان
د لغمان ولایت د چاپېریال ساتنې ریاست په مشرۍ، د یاسر عمر
مشرقیوال د طبي کثافاتو تنظیفي او خدماتي شرکت له لوري د طبي کثافاتو د راټولولو،
مصؤن انتقال او معیاري له منځه وړلو لپاره پرانیست غونډه ترسره شوه. دا بهیر د طبي
اتحادیو سره د شوي قرارداد له مخې په ټول لغمان ولایت کې عملي کېږي.
په دې غونډه کې د لغمان ولایت د چاپېریال ساتنې رئیس حاجي
احمد شاه "ابراهیم"، د ولایت مقام استازی بلال "شفق"، د ریاست
کارکوونکو، د طبي اتحادیو استازو، د کلینیکونو مسؤلینو، نرسانو او ژورنالیستانو ګډون
کړی وو.
غونډه د قرآن کریم په تلاوت پیل شوه، وروسته لغمان ولایت د
چاپېریال ساتنې رئیس خپله وینا وړاندې کړه. نوموړي وویل چې د عامو او طبي کثافاتو
ترمنځ لوی توپیر شته او طبي کثافات د انسانانو روغتیا او چاپېریال لپاره ډېر
خطرناک دي.
هغه زیاته کړه که دا کثافات په سمه توګه مدیریت نه شي، نو د
ساري ناروغیو د خپرېدو ترڅنګ هوا، اوبه او خاوره هم ککړوي.
د غونډې په لړ کې ډاکتر رفیع الله د طبي کثافاتو د زیانونو
په اړه خبرې وکړې او د هغوی د خوندي انتقال له دې پروسې یې ملاتړ څرګند کړ.
همدارنګه د طبي اتحادیو مشران او د کلینیکونو مسؤلینو هم د
دې پروګرام ملاتړ اعلان کړ او ویې ویل چې د دې بهیر د بریالیتوب لپاره به هر ډول
همکاري کوي.