وروستی
ننګرهار کې د اقلیمي بدلون یو ورځنی ورکشاپ ترسره شو
۱۴۴۷ کال د ذوالقعدې۱۵نېټه/ ننګرهار
د ننګرهار ولايت د چاپېريال ساتنې رياست له لوري، د ملګرو
ملتونو د پراختيايي ادارې (UNDP) په
تخنيکي او مالي ملاتړ، د ختيځ زون په کچه د «اقليم بدلون او آفاتو پر وړاندې د
محلي چارهسازۍ پياوړتيا» تر عنوان لاندې يو ورځنی ورکشاپ ترسره شو.
په ياد ورکشاپ کې د ختيځ زون د پوهنتونونو استادانو، علماوو
کرامو، د دولتي ادارو مسولينو، قومي مشرانو او آغلو خویندو ګډون کړی وو.
د ننګرهار ولايت د چاپېريال ساتنې رئيس قاري احسان الله
مختار په خپله وينا کې وويل چې اقليم بدلون په هېواد کې د وچکالۍ، سېلابونو، ځمکې ښوېدنې
او د تودوخې د لوړېدو له جدي ګواښونو سره مخ کړی دی. نوموړي زياته کړه چې د دې
ستونزو د کمولو لپاره محلي چارهسازي يوه اغېزمنه لاره ده، ځکه خلک په خپله کچه د
ستونزو حل ته لار پيدا کوي او د طبيعي آفتونو پر وړاندې چټک غبرګون ښيي.
نوموړي د اوبو ذخیره کول، د ځنګلونو ساتنه، د خاورې د تخریب
مخنیوی، اقلیم ته مناسب کرنه، د وچکالۍ پر وړاندې مقاوم تخمونه، د اوبو سپما او د
سېلابونو د مخنیوي بندونو جوړول د مهمو اقداماتو په توګه ياد کړل.
ښاغلي مختار وويل چې د ننګرهار ولايت د چاپېريال ساتنې
رياست تل هڅه کړې چې د عامه پوهاوي او روزنيزو پروګرامونو له لارې خلکو ته د اقليم
بدلون په اړه پوهاوی ورکړي، او دا ورکشاپ هم د همدې لړۍ يوه برخه ده.
د UNDP د ننګرهار
ولايت نماينده د ښه راغلاست ترڅنګ اقليم بدلون
کې د شواهدو پر بنسټ د همغږۍ له لارې د ټولشموله اقلیمي حکومتدارۍ د پیاوړتیا
په اړه مفصل معلومات وړاندې کړل. هغوی ټینګار وکړ چې د اقلیم بدلون د اغېزو د
کمولو لپاره د دولتي ادارو، سیمهییزو ټولنو او نړیوالو شریکانو ترمنځ همغږي او ګډ
کار اړین دی، څو د پالیسیو پلي کېدل اغېزمن او پایدار شي.
همدارنګه د UNDP بل
استازي د اقلیم بدلون د اوسنیو تمایلاتو او اغېزو په اړه هر اړخیز پريزنټيشن وړاندې
کړل. نوموړي د اقلیمي بدلون د زیاتېدونکو ستونزو لکه د تودوخې لوړېدو، وچکالۍ، ناڅاپي
سېلابونو او د اوبو د سرچینو کمېدو یادونه وکړه.
نوموړي په خپلو خبرو کې د اقلیم بدلون او اوبو مدیریت ستونزې
هم وڅېړلې او د حل لپاره یې د اغېزمنو پالیسیو، سیمهییزې همغږۍ او تخنیکي ملاتړ
پر اړتیا ټینګار وکړ.
همدارنګه یې د ختیځې سیمې د اقلیمي تطابق ستراتیژۍ په اړه یې
معلومات ورکړل او څرګنده یې کړه چې د دې ستراتیژۍ هدف د ټولنو د مقاومت لوړول، د
طبیعي سرچینو ښه مدیریت او د اقلیمي خطرونو کمول دي؛ ترڅو سیمهییز خلک وکولای شي
د اقلیم بدلون له اغېزو سره په اغېزمن ډول مقابله وکړي.
همدارنګه په ياد ورکشاپ کې ګروپي کار هم ترسره او د ګډونوالو
پوښتنې، ځوابونه او د سيمي د ټولنې له استازو د ځايي چاپېريال څخه واقعي او ریښتیني
کيسي او تجربې شريکې کړې.