کابل کې د زبالو د مدیریت په تړاو ملي کنفرانس ترسره شو

۱۴۴۷کال د ذوالقعدې‌ ۲۵مه/ کابل
د چاپېریال ساتنې خوندیتوب او زبالو د مدیریت په پار د چاپېریال ساتنې عمومي ادارې له لوري د EPTDO مؤسسې په همکارۍ نن سه‌شنبه د ۱۴۰۵کال د ثور میاشتې په ۲۲مه نېټه د کابل ښار پارک سټار هوټل کې د (زبالو مدیریت) تر عنوان لاندې یو ورځنی ملي کنفرانس ترسره شو.
په دې کنفرانس کې د امارتي ادارو لوړ پوړو چارواکو، ملي او نړۍوالو مؤسسو استازو، پوهنتونو استادانو، متخصصینو او رسنیو استازو ګډون کړی وو.

د کنفرانس په پیل کې د قران عظیم الشان مبارک آیتونه ولوستل شول ورپسې د چاپېریال ساتنې زده‌کړو او پراختیا (EPTDO) مؤسسې رئیس عبدالهادي اڅکزي ګډونوالو ته ښه راغلاست ووایه او د زبالو د مدیریت په اړه یې خبرې وکړې. نوموړي وویل: د اقلیمي بدلون او زبالو د ناوړه اغېزو څخه افغانستان زیات اغېزمن هېواد دی؛ نو زموږ لپاره لازمه ده چې عملي اقدامات وکړو.
ښاغلي اڅکزي وویل اوسمهال زبالې یو بحران ګرځیدلی او موږ هڅه کوو چې په دې برخه کې نړۍوالې مؤسسې وهڅوو څو افغانستان سره د زبالو د مدیریت په برخه کې همکاري وکړي.
د چاپېریال ساتنې ادارې عمومي رئیس الحاج مولوي مطیع الحق خالص د انسانانو او ټولو ژوندیو موجوداتو پر ژوندانه د زبالو د اغېزو په هکله وینا وکړه. نوموړي په خپلو خبرو کې وویل د کثافاتو له مشکل سره یوازې افغانستان نه بلکې له اقلیمي بدلون وروسته مخ پر ودې هېوادونه د زبالو د عدم مدیریت له سترو ګواښونو سره مخ دي.

ښاغلي خالص وویل: دا مهال د نفوسو د ډیرښت له امله زموږ لوی ښارونه د زبالو له ګواښ سره مخ دي، په ښارنو کې د خلکو نفوس له حد څخه زیات شوی او زبالې په سالم شکل نه شي مدیریت کیدی. ده ټینګار وکړ چې د زبالو د مدیریت مسئلې ته باید لومړیتوب ورکړو.
عمومي رئیس زیاته کړه چې د زبالو د مدیریت لپاره باید حکومت، ملت او نړۍوالې مؤسسې په ګډه حل لارې پیدا کړي. ده له خصوصي سکتور او هېوادوالو غوښتنه وکړه چې د زبالو د مدیریت په برخه کې مشترک قدمونه واخلي او د ښارونو د پاکوالي په پرخه کې تر خپله وسه کار وکړي.
د چاپېریال ساتنې ادارې عمومي رئیس ټینګار وکړ چې په ټولو صنعتي او پرمختیایي چارو کې چاپېریال ساتنې ته جدي پاملرنه وشي، خصوصي سکټور باید په دې برخه کې کار وکړي او د کثافاتو راټولولو، تفکیک او له منځه وړلو په برخه کې پانګونې وکړي.

د کابل ښاروالۍ د چاپېریالي روغتیا ساتنې ریاست مرستیال مفتي فضل کریم احمد د کثافاتو د مدیریت او زیانونو په تړاو خبرې وکړې او ژمنه یې وکړه چې کابل ښاروالي هڅه کوي کابل ښاریانو ته لازم خدمات وړاندې کړي.

د اریانا نیوز ټلویزیون رئیس مجیب الرحمن بهیر د عامه پوهاوي او چاپېریال ساتنې په برخه کې د رسنیو او ټولنو رول او مسوولیتونو په هکله هر اړخیزه وینا وکړه.
د کنفرانس په لړ کې د متخصصینو او پوهنتون استادانو له لوري د زبالو د مدیریت په تړاو، څېړنیز او معلوماتي پرزنټېشنونه وړاندې شول او د ګډونوالو پوښتنو ته ځوابونه ورکړل شول.

په پای کې د چاپېریال ساتنې ادارې عمومي رئیس الحاج مولوي مطیع الحق خالص له لوري د کنفرانس ارزونه وشوه او ټینګار یې وکړ چې خلک او حکومت باید د زبالو د تنظیم او مدیریت په برخه عملي اقدامات ترسره او مخکې قدمونه واخلي.

May 13, 2026