وروستی
د وحشي ژویو اجرائیوي کمېټې غونډه وکړه
د چاپېریال ساتنې ملي ادارې مسلکي معین، انجنیر عزت الله صدیقي په مشرۍ د افغانستان د وحشي ژویو اجرائیوي کمېټې نن د لیندۍ په ۲۷مه نېټه د دې ادارې د بند امیر د غونډو په تالار کې ناسته وکړه.
په دې غونډه کې د کابل پوهنتون استادانو، متخصصینو، د وحشي ژویو د ساتنې (WCS) مؤسسې استازو او د دې ادارې کارپوهانو ګډون کړی وو.
د غونډې په پیل کې د چاپېریال ساتنې ملي ادارې مسلکي معین د ګډونوالو هرکلی وکړ او د دې کمېټې کړنې یې با ارزښته وبللې، نوموړي وویل: د وحشي ژویو او ژوندبڼو موضوع په نړیواله کچه له ډېر اهمیت څخه برخمنه ده او له نېکه مرغه چې افغانستان د وحشي ژویو، ژوند بڼو، ځنګلونو او پراخو طبیعي سرچینو له پلوه غني هېواد دی.
ښاغلي صدیقي ټینګار وکړ چې په افغانستان کې د وحشي ژویو او ژوند بڼو د اوسني وضعیت په برخه کې باید کره او دقیقې مطالعې وشي؛ ترڅو وکولای شو د نړیوالو مالي میکانیزمونو څخه د وحشي ژویو د ساتنې لپاره زیاتې مرستې ترلاسه کړو.
د غونډې په لړ کې د دې ادارې د طبيعي میراثونو د ساتنې رئیس، جلال الدین ناصري د افغانستان د وحشي ژویو اجرائیوي کمېټې د مسولیتونو، مکلفیتونو او اړوندو نړیوالو کنوانسیونونو په هکله هر اړخیز معلوماتي پرېزنټېشن وړاندې کړ.
د کمېټې د غړیو له خوا د وحشي ژویو د ساتنې په تړاو مختلف نظرونه، وړاندیزونه او پوښتنې وړاندې شوي چې د مسلکي معین له خوا ورته هر اړخیز ځوابونه ورکړل شول.
همدا راز د کابل پوهنتون استاد مجتبی بشري لخوا هم د وحشي ژویو د ساتنې په برخه کې د کوچنیو مالي مرستو پروګرام (SGP) څخه د نوې ترلاسه شوې پروژې په هکله چې د وحشي ژویو د ساتنې سربېره د اجرائیوي کمېټې لوجستیکي مرستې به هم کوي؛ ګډونوالو ته معلومات ورکړل شول.
د غونډې په پای کې پرېکړه وشوه چې د کمېټې په پخوانۍ کړنلارې دې کره کتنه وشي، د وحشي ژویو اړوند په مختلفو موضوعاتو دې پانګونه او د متخصصینو لخوا دې کره او دقیقې مطالعې وشي، د وحشي ژویو د قاچاق د مخنیوي او اهمیت په هکله دې سرحدي او د ګمرکونو پولیسو او امنیت کارکوونکو ته د عامه پوهاوي روزنیز پروګرامونه جوړ شي.