وروستی
د سوداګرو او صنعت کارانو په غونډه کې د چاپېريال ساتنې ملي ادارې مسلکي معين وينا وکړه
د چاپېريال ساتنې ملي ادارې مسلکي معين انجنيرعزت الله صديقي د روان کال د ليندۍ په ۲۸مه نېټه د افغانستان د سوداګرۍ لارښود (AYP) په دويمه ناسته کې چې پکې سلهاوو تنو ملي او نړيوالو سوداګرو، صنعت کارانو او متشبثينو ګډون کړی وو، د چاپېريالي ننګونو په تړاو خبرې وکړې؛ نوموړي د چاپېريال ساتنې، اقتصاد او ټولنې د اهميت په تړاو وينا وکړه او و ويې ويل: افغانستان له جنګ څخه وروسته د مخ پر ودې هېواد په توګه اقتصادي ودې ته اړتيا لري، خو زموږ اقتصادي وده بايد تلپاتې او دوامداره وي ترڅو چاپېريال، اقتصاد او انساني اړتياوې پکې يوځای او په ګډه توګه تامين شي. که د دغو درې اصلونو ترمنځ له پيل څخه همغږي او سازښت رامنځته نه شي؛ نو په راتلونکې کې به د ګڼو چاپېريالي ننګونو او ستونزو سره مخامخ شو، چې يوه بېلګه يې د کابل ښار غير پلاني وده ده چې په تېرو ۱۸ کلونو کې ترسره شوې او اوس نه شو کولای چې په ډېر لګښت سره هغه جبران کړو.
ښاغلي صديقي د خپلو خبرو په ترڅ کې وويل: له خصوصي سکتور، صنعت کارانو، متشبثينو او سوداګرو څخه غواړو چې ترڅو د خپلو تولیدي او صنعتي پروژو په سر کې چاپېريالي موضوعات په پام کې ونيسي او له ټولو صنعت کارانو او متشبثينو څخه هيله لرم ترڅو چاپېريالي جوازليکونه ترلاسه کړي او د پاکو او له چاپېريال سره د سازښت لرونکو ټکنالوژيو، زرغونو ټکنالوژيو، د پاتې شونو، تورو اوبو تنظيم او د هوا ککړتيا د کنټرولولو په برخه کې پانګونه وکړي؛ ترڅو په راتلونکي کې هوسا او زرغون هېواد ولرو.
دولتي ادارو، خصوصي سکتور او ټولو اقشارو ته په کار ده چې په دې برخه کې ګډ کار وکړي.
د چاپېريال ساتنې ملي ادارې مسلکي معين د دې ناستې له جوړوونکو مننه وکړه چې د غونډې په اجنډا کې يې د چاپېريال ساتنې موضوع شامله کړې او هيله يې څرګنده کړه چې په راتلونکي کې به په ګده کار کوي.