وروستی
په چاپېريال ساتنې ملي اداره کې د اساسي قانون اونۍ ولمانځل شوه
د اساسي قانون د تصويب شپاړسمه کليزه پرون يک شنبه د روان کال د مرغومي میاشتې په ۲۲مه نېټه د چاپېريال ساتنې ملي ادارې کول حشمت خان د غونډو په تالار کې د چاپېريال ساتنې ملي ادارې مسکلي معین انجينر عزت الله صديقي، د اساسي قانون پر تطبيق د نظارت کميسيون استازي او د ادارې روئساو او کارکوونکو په ګډون سره ولمانځل شوه.
غونډه د قران کريم د څو سپېڅلو آياتونو په تلاوت او د ملي سرود په خپرولو سره پيل شوه. وروسته له هغې د چاپېريال ساتنې ملي ادارې مسلکي معين انجينر عزت الله صديقی خبرې وکړې او د غونډې له ټولو تنظيموونکو څخه يې مننه وکړه.
ښاغلي صديقي د خپلو خبرو په ترڅ کې وويل: د هېواد اساسي قانون د پنځلسمې مادې او د چاپېريال ساتنې قانون په اساس، د دې ادارې لخوا د چاپېريال او طبيعي سرچينو د ساتنې په موخه په لسهاوو مقررې او طرزالعملونه تنظيم او پلي شوي دي، چې دا مسئله طبيعي او چاپېريالي ارزښتونو ته د اساسي قانون د ځانګړې پاملرنې څرګندونه کوي.
د چاپېريال ساتنې ملي ادارې مسلکي معين وويل: د اساسي قانون د پنځلسمې مادې ترڅنګ، په شپږمې، اومې او نهمې مادو کې هم په غير مستقيم ډول چاپېريال ساتنې ته اشاره شوې ده او دا امر له قانوني اړخ څخه د افغانستان اسلامي جمهوري دولت ته دا فرصت برابروي، چې د چاپېريال ساتنې په برخه کې ۱۴ پروتوکولونو او نړیوالو کنوانسينونو سره ملحق شي.
د اساسي قانون پر تطبيق د نظارت کميسيون استازي محمد خليل قيامي هم په خپلو خبرو کې، د اساسي قانون په رڼا کې د تقنيني اسنادو د تدوین په برخه کې د چاپېريال ساتنې ملي ادارې له اقداماتو او اجرااتو څخه قدرداني وکړه.
د غونډې په وروستيو شېبو کې د چاپېريال ساتنې ملي ادارې د پاليسۍ او تقنين رياست سرپرست، هارون احمدزي هم وينا وکړه او د اساسي قانون او نورو هغو قوانینو چې د چاپېريال ساتنې په برخه کې تدوين شوي، د عامه پوهاوي د اهميت په اړه ټينګار وکړ.