وروستی
د کابل ښار د فاضلابو ماسټر پلان قرارداد لاسلیک شو
د سلواغې ۱۶ مه - کابل
د کابل ښار د فاضلابو ماسټر پلان قرارداد نن د سلواغې په ۱۶مه نېټه د مالیې وزارت سرپرست وزیر محمد همایون قیومي، د چاپېریال ساتنې ملي ادارې عمومي رئیس شاه زمان میوندي، د دې ادارې مسلکي معین انجنیر عزت الله صدیقي، کابل والي او ښاروال، د پلازمېنې زون د پراختیا ادارې رئیس، د KFW دفتر رئیس او د اړوندو ادارو رئیسانو او متخصصینو په حضور کې لاسلیک شو.
د کابل ښار د فاضلابو ماسټر پلان به د آلمان په مالي مرسته په ۱۴ میاشتو کې چمتو او د دورش آلماني کمپنۍ د اوبو رسونې او کانالیزاسیون شرکت تر نظر لاندې په افغانستان کې پلی شي.
د دې پروژې ټولټال ارزښت ۳.۴ میلیونه امریکایي ډالره دی او له دې برخې یو میلیون به یې د افغانستان حکومت او پاتي ۲.۴ میلیونه امریکایي ډالره به د المان پراختیایي بانک له لوري ورکول کېږي، چې د کابل ښار ۲۲ ناحیې او ټولې سوداګرېزې او صنعتې سیمې به تر پوښښ لاندې راولي.
د چاپېریال ساتنې ملي اداره د هېواد په کچه د چاپېریال ساتنې لومړۍ درجې مسوولې او سهم لرونکې ادارې په توګه د کابل ښار د ککړو اوبو د مدیریت په برخه کې چې اوسمهال ستر چاپېریالي ګواښ ګڼل کیږي، د دې سند لاسلیک کېدل اړین او مثبت ګام بولي او له اړوندو ادارو سره د دې پروژې په پلي کېدو کې هر ډول همکارۍ ته چمتو ده.