وروستی
د کوچنیو چاپېریالي پروژو لپاره د ستراتېژۍ جوړولو په هکله مشورتي غونډه ترسره شوه
د سلواغې۱۹مه – کابل
د چاپېریال ساتنې ملي ادارې عمومي رئیس شاه زمان میوندي په مشرۍ د کوچنیو چاپېریالي مرستو د اوومې ستراتېژۍ د جوړولو لپاره د نظرونو شریکولو په موخه د سلواغې په ۱۹مه نېټه مشورتي غونډه ترسره شوه چې پکې د دې ادارې مسلکي معین انجنیر عزت الله صدیقي، د نړیوالو موسسو او مدني ټولنو استازو ګډون کړی وو.
د چاپېریال ساتنې ملي ادارې عمومي رئیس په خپله پرانېسته وینا کې وویل: د کوچنیو چاپېریالي مرستو(SGP) پروژې د چاپېریالي وضعیت د ښه والي، د خلکو د ژوندانه د هوساینې او د هېواد په لېرې پرتو سیمو کې د فقر له منځه وړلو په موخه د مدني ټولنو له خوا پلي کیږي. ده وویل: (SGP) په تېرو اتو کلونو کې د هېواد په مختلفو سیمو کې شاوخوا سل کوچنۍ چاپېریالي پروژې په بریالیتوب سره پلې کړې دي. ښاغلي میوندي د چاپېریال ساتنې په برخه کې د نړیوالو موسسو او مدني ټولنو له همکارۍ مننه وکړه.
د کوچنیو چاپېریالي مرستو (SGP) مالي سرچینې د چاپېریالي اسانتیاوو نړیوال سازمان له خوا چمتو کیږي او د ملګرو ملتونو د پراختیایي پروګرام (UNDP) په تخنیکي همکارۍ پلي کیږي چې د چاپېریال ساتنې ملي اداره له (GEF) سره د همغږۍ کوونکې او ارتباطي ارګان په توګه د (SGP) پروژو له تطبیق څخه څارنه کوي.
د غونډې په لړ کې د چاپېریالي چارو متخصصینو له خوا د (SGP) اوومې ستراتېژۍ د جوړولو، د تطبیق د ساحو او د هغو معیارونو په تړاو چې باید په پام کې ونیول شي، معلوماتي پرزنټېشنونه وړاندې شول او ګډونوالو د یادې ستراتېژۍ د غني کولو لپاره خپل نظرونه، تجربې او وړاندیزونه شریک کړل.
د چاپېریال ملي ادارې مسلکي معین انجنیر عزت الله صدیقي د ستراتېژۍ د غني کولو لپاره د ګډونوالو نظرونه او وړاندیزونه اړین وبلل او د نوموړو پروژو په تطبیق کې یې د چاپېریال ساتنې ملي ادارې د مشرتابه اهمیت او رول اغېزناکه وباله او د پروژو پر څارنه یې ټينګار وکړ. ښاغلي صدیقي له ګډونوالو غوښتنه وکړه چې خپل نظرونه او وړاندیزونه دې د ستراتېژۍ په مسوده کې ځای پرځای او په بله غونډه کې دې وړاندې کړي.
د یادونې وړ ده چې د نړیوالو چاپېریالي اسانتیاوو سازمان د پروسیجر مطابق هر څلور کاله وروسته باید په ستراتېژۍ بیاکتنه وشي. دغه اوومه ستراتېژي ده چې د نړیوالو چاپېریالي اسانتیاوو سازمان (GEF) په مالي ملاتړ چمتو کیږي
خبریال: عبدالولي عابد
عکاس: سید امید سادات