وروستی
د اقلیم زرغون صندوق د پېژندنې او تخنیکي مسایلو د روزنیزو ورکشاپونو په دوام
د سلواغې۲۱مه - کابل
د چاپېريال ساتنې ملي ادارې د ملګرو ملتونو د خوړو او کرنې سازمان (FAO) په تخنيکي همکارۍ او د اقليم زرغون صندوق (GCF) په مالي ملاتړ د اقلیم زرغون صندوق د پېژندنې، تخنیکي مسایلو او د نوموړي صندوق د اصولو او اساساتو په هکله د دې ادارې د کول حشمت خان د غونډو په تالار کې دوه ورځنی روزنیز ورکشاپ جوړ کړ.
په دغه تخنیکي ورکشاپ کې د ۱۱ ولایتونو (کندهار، هرات، هلمند، ارزګان، نیمروز، غور، بامیان، بلخ، جوزجان، فاریاب او سمنګان) ولایتونو د چاپېریال ساتنې، کرنې، اوبو لګولو او مالدارۍ، ښځو چارو، کلیو پراخیتا او داوبو او انرژۍ ریاستونو ۵۰ پنځوسو تنو رئیسانو او استازو ګډون کړی وو.
د ورکشاپ د پرانېستلو پر مهال د دې ادارې د اقلیمي بدلون ریاست سرپرست، احمد صمیم هوشمند د اقليم زرغون صندوق د رامنځته کېدو او له یاد صندوق څخه د مالي مرستو ترلاسه کولو د څرنګوالي په اړه ګډونوالو ته معلومات ورکړل.
د ورکشاپ په لړ کې د اقليمي بدلون کارپوهانو له خوا د اقليمي بدلون سره د مبارزې، سازښت، د اغېزو راکمولو، د اقليم زرغون صندوق (GCF) څخه د مالي مرستو ترلاسه کولو او بېلا بېلو تخنیکي مسایلو په هکله ګډونوالو ته معلوماتي پرزنټېشنونه وړاندې شول.
همدا راز ګډونوال په مختلفو ګروپونو ووېشل شول او د اقليمي بدلون سره د مبارزې او حل لارو چارو په هکله یې خپل نظرونه او وړاندیزونه له کارپوهانو سره شريک کړل.
د چاپېریال ساتنې ملي ادارې د پالیسۍ او نړیوالو اړیکو معین ادریس ملیار د ورکشاپ په پای کې له ګډونوالو مننه وکړه او ویې ویل: اوسمهال افغانستان له اقلیمي بدلون څخه زیات اغېزمن دی؛ نو د اقلیم زرغون صندوق څخه د مالي سرچينو د ترلاسه کولو لپاره د دولتي ادارو، مدني ټولنو همکاري او د دوی ترمنځ قوي همغږۍ او د سيمې خلکو د نظرونو اخيستو ته اړتيا ده؛ ترڅو وکولای شو د دقیقو برنامو په جوړولو سره د اقليم زرغون صندوق د مالي سرچينو له لارې په خپل هېواد کې مختلفې پروژې پلې کړو.
د یادولو وړ ده چې د نړۍ پرمختللي هېوادونه دې ته ژمن دي چې د اقلیم زرغون صندوق له لارې مخ پر ودې هېوادونو سره د اقليمي بدلون د اغیزو راکمولو او سازښت په برخه کې د ځانګړو شرایطو په پام کې نیولو سره مالي سرچینې چمتو کوي.
یاد ورکشاپ د تېرې میاشتې په دوام جوړ شوی و او لړۍ به یې د زونونو په کچه نورو ولایتونو ته هم وغځیږي.
خبریال: عبدالولي عابد
عکاس: سید امید سادات