وروستی
میوندي: د هواککړتیا د مخنیوي لپاره به د ولسمشر حکم پلی کوو
د سلواغې ۲۲مه – کابل
د چاپېریال ساتنې ملي ادارې د کابل امینه قومندانۍ په همکارۍ د سلواغې په ۲۲مه نېټه د چاپېریال ساتنې ملي ادارې عمومي رئیس شاه زمان میوندي، د کابل امینه قومندان ډګر جنرال سید محمد روشندل او د دې ادارې مسلکي معین انجنیر عزت الله صدیقي په حضور مشورتي غونډه ترسره کړه چې پکې د حوزو آمرینو، د کابل ولایت ولسوالانو، د تصدیو او سوداګریزو مرکزونو مالکینو ګډون کړی وو.
ښاغلي میوندي د هغو تصدیو له مالکینو مننه وکړه چې خپل سونګ سیسټمونه یې په معیاري فلترونو سمبال او اصلاح کړي دي، ده ویې ویل: تاسو دغه کار د حکومت لپاره نه بلکې د خپل ځان، کورنۍ او خلکو د روغتیا ساتنې په موخه ترسره کړی او که خصوصي سکټور او اصناف د دود د تصفیې فلترونه و نه لګوي؛ نو د هواککړوونکې منابع به وي.
نوموړي زیاته کړه: د هوا ککړتیا د راکمولو او مخنیوي مقررې تعدیل، د چاپېریالي چارو د مفتشینو زیاتول او پیاوړتیا، د مالي سرچینو برابرول، د چاپېریالي جوازلیکونو د توزیع لړۍ اصلاح کول، له ۵۰۰ تصدیو نظارت او د هوا ککړتیا ۱۰۵سرچینو بندول د اړینو او عملي اقداماتو له جملې څخه دي چې په دې وروستیو کې ترسره شوي دي.
د چاپېریال ساتنې ملي ادارې عمومي رئیس ټینګار وکړ چې د هواککړتیا د مخنیوي او د جمهوري ریاست عالي مقام د حکم د تطبیق لپاره به کوټلي ګامونه پورته کوي او د هیچا پروا به نه ساتي.
په دې مشورتي غونډه کې د دې ادارې مسلکي معین انجنیر عزت الله صدیقي هم وینا وکړه او د هوا ککړتیا راکمولو او مخنیوي په برخه کې یې د قوانینو، مقررو او جمهوري ریاست د حکمونو په پلي کېدو ټينګار وکړ.
د کابل امینه قوماندان د هوا ککړتیا د راکمولو او مخنیوي په موخه د قوانینو د تطبیق په برخه کې د پولیسو د هر ډول همکارۍ ژمنه وکړه .
د غونډې په پای کې د چاپېریال ساتنې ملي ادارې عمومي رئیس د ګډونوالو نظرونه او وړاندیزونه واورېدل او د هغوی پوښتنو ته یې ځوابونه ورکړل.