وروستی
د چاپېریال ساتنې ملي ادارې او تجارت او صنعت وزارت ترمنځ د جوازونو په ورکړه کې د اسانتیا په موخه غونډه وشوه.
د سلواغې ۲۹مه – کابل
د چاپېریال ساتنې ملي ادارې مسلکي معین انجنیر عزت الله صدیقي په مشرۍ غونډه وشوه چې پکې د تجارت او صنعت وزارت د فکري ملکیتونو د ثبت عمومي رئیس، ورسره پلاوي یې، د دې ادارې رئیسانو او متخصصینو ګډون کړی وو.
ښاغلي صدیقي وویل: د دې غونډې موخه دا ده چې د چاپېریالي جواز لیکونو د توزیع پروسه اسانه او کاروباریانو ته ښه خدمتونه وړاندې کړو نوموړي زیاته کړه: د چاپېریالي جواز لیکونو په ورکړه کې ځینې ستونزې وې لکه: د صنعتي فعالیتونو د تفکیک نشتوالی، د جوازلیکونو د وېش په لړۍ کې ځنډ او د چاپېریال ساتنې ملي ادارې له مرکزي دفتر څخه یې توزیع کول او... هغه څه و چې موږ یې دې ته اړ کړو چې یاد سیسټم ریفورم او اصلاح کړو.
د غونډې په لړ کې د دې ادارې د تلپاتې پراختیا او چاپېریالي چارو د ارزونې رئیس نقیب الله صدیقي د جوازلیکونو د ورکړې لړۍ د څرنګوالي په اړه معلوماتي پرزنټیشن وړاندې کړ.
همدا راز د ثبت مرکزي ادارې عمومي رئیس هم د جوازلیکونو د ورکړې په برخه کې د ځینو ستونزو یادونه وکړه او د چاپېریال ساتنې ملي ادارې دغه اقدام یې وستایه، نوموړي د چاپېریالي جوازو د وېش لړۍ د ډيجټل کولو او لااستانیا را منځته کولو په برخه کې د همکارۍ ژمنه وکړه.
د دغه ریفورم په اساس، ټول فعالیتونه د چاپېریالي اغېزو د اروزونې مقررې د موادو مطابق په څلورو ګټګوریو وېشل شوي چې د چاپېریالي تګلارو او مقررو مطابق به د سترو پروژو جوازونه له مرکزي ادارې څخه او د کوچنیو پروژو جوازلیکونه به د ولایتي ریاستونو له خوا توزیع کیږي.
د چاپېریالي جوازلیکونو د ورکړې پروسې ساده کول هغه چاره ده چې په تېرو څو کلونو کې د هېواد په مختلفو سیمو کې صنعتي فعالیتونه زیات شوي او دا د دې لامل شوي چې دولت په ځانګړې توګه د چاپېریال ساتنې ملي ادارې له چاپېریالي ستونزو او ګواښونو سره مبارزې ته لومړیتوب ورکړي.
د چاپېریال ساتنې ملي اداره د دې موضوع ارزښت ته په کتو د هېواد د اساسي قانون او مقررو پر بنسټ مکلفه وه چې ټولو کوچنیو او سترو صنتعي شرکتونو ته چاپېریالي جوازلیکونه ورکړي؛ خو د شرکتونو او کاروبارونو زیاتېدو او ورځنیو اړتیاوو ته په کتو د جوازلیکونو د توزیع په څرنګوالي کې څه ستونزې وې چې ډیری کاروباریانو یې د ریفورم او اصلاح غوښتنه کوله.