وروستی
د اقلیمزرغونصندوق د پېژندنې او تخنیکي مسایلو د روزنیزو ورکشاپونو په دوام
د کب۶مه - کابل
د چاپېريال ساتنې ملي ادارې د ملګرو ملتونو د خوړو او کرنې سازمان (FAO) په تخنيکي همکارۍ او د اقليم زرغون صندوق (GCF) په مالي ملاتړ د اقلیم زرغون صندوق د پېژندنې، تخنیکي مسایلو او د نوموړي صندوق د اصولو او اساساتو په هکله د دې ادارې د بند امیر د غونډو په تالار کې دوه ورځنی درېیم روزنیز ورکشاپ جوړ کړ.
د چاپېریال ساتنې ملي ادارې د پالیسۍ او نړیوالو اړیکو معین ادریس ملیار د ورکشاپ په پیل کې ګډونوالو ته ښه راغلاست ووایه او زیاته یې کړه: اوسمهال اقلیمي بدلون هغه پدیده ده چې موږ ورسره لاس او ګرېوان یو چې دا زموږ پر اقتصاد او ملي امینت نیغ په نیغه اغېزه کوي؛ ځکه افغانستان یو کرنیز هېواد دی او اوسمهال له اقلیمي بدلون څخه خورا اغیزمن شوی دی.
ښاغلي ملیار وویل: اوبه هم مهم سکتور دی چې له اقلیمي بدلون څخه اغېزمن شوی موږ ته پکار ده چې له اقلیمي بدلون سره د سازښت او مبارزې لپاره د اړوندو ادارو په ګډه همکارۍ له (#GCF) څخه د مرستو ترلاسه کولو لپاره ګډې هڅې وکړو.
په دغه تخنیکي ورکشاپ کې د کابل، سرپل، زابل، بادغیس، فراه، پکتیکا، خوست، بغلان، کندز، تخاز او بدخشان ولایتونو د چاپېریال ساتنې، کرنې او اوبو لګولو، ښځو چارو، کلیو پراخیتا او داوبو او انرژۍ ریاستونو (۵۰) تنو رئیسانو او نماینده ګانو ګډون کړی وو.
دغه ورکشاپ به دوه ورځې دوام وکړي او په لړ کې به یې د اقليمي بدلون کارپوهانو له خوا د اقليمي بدلون سره د مبارزې، سازښت، د اغېزو راکمولو، د اقليم زرغون صندوق (GCF) څخه د مالي مرستو ترلاسه کولو او بېلا بېلو تخنیکي مسایلو په هکله ګډونوالو ته هر اړخیز معلوماتي پرزنټېشنونه وړاندې شي.
د یادولو وړ ده چې د نړۍ پرمختللي هېوادونه دې ته ژمن دي چې د اقلیم زرغون صندوق له لارې مخ پر ودې هېوادونو سره د اقليمي بدلون د اغیزو راکمولو او سازښت په برخه کې د ځانګړو شرایطو په پام کې نیولو سره مالي سرچینې چمتو کوي.
له دې وروسته به د زونونو په کچه د افغانستان د ملي برنامې جوړولو او (GCF) ته د وړاندې کولو په پار له دولتي ادارو، مدني ټولنو، سازمانونو او کلیوالي شوراګانو سره مشورتي غونډې ترسره شي.