وروستی
د سرتیري ملي ورځ په چاپېریال ساتنې ملي اداره کې ولمانځل شوه
د کب ۱۰مه – کابل
د کب نهمه چې د سرتیري ملي ورځې سره سمون لري د چاپېریال ساتنې ملي ادارې له خوا ولمانځل شوه، د کب په لسمه نېټه په دې اداره کې یو لړ مراسم جوړ شوي وو چې پکې د چاپېریال ساتنې ملي ادارې عمومي رئیس شاه زمان میوندي، د دې ادارې معینانو، رئیسانو، د چټک غبرګون قطعې قومندان ډګروال شیر محمد انوار او د دې قطعې په لسګونو سرتېرو ګډون کړی وو.
دغه مراسم د قران عظیم شان په تلاوت پیل ورپسې د چاپېریال ساتنې ملي ادارې عمومي رئیس شاه زمان میوندي د هېواد زړورو سرتېرو قربانۍ، سرښندنې او صادقانه خدمت وستایه. ده وویل: زموږ زړور سرتېري د هېواد او خلکو افتخار دي او موږ د دوی د سرښندنو او قربانیو پوروړي یو.
ښاغلي میوندي زیاته کړه: په وروستیو کلونو کې ټولو سرتېرو په ګډه همکارۍ او په صادقانه توګه د ادارې د مشرتابه او کارکوونکو د امنیت په ټینګښت کې هڅه کړې ده.
د چټک غبرګون قطعې قومندان هم وینا وکړه او زیاته یې کړه: زموږ زړور سرتېري د خلکو د ځان، مال او د هېواد ملي نوامیسو ساتونکي دي او دوی په پوره صداقت او مسوولیت سره خپله دنده ترسره کوي، ده د چاپېریال ساتنې ملي ادارې عمومي رئیس څخه مننه وکړه چې سرتېري یې د هېواد د ملي یووالي سمبول وبلل او له دوی سره یې نېکه رویه وکړه.
دغه محفل د چاپېریال ساتنې ملي ادارې امنیتي موظفو سرتېرو ته د تقدیر پاڼو په ویشلو او په هېواد کې د تلپاتې سولې د راتګ په هیله پای ته ورسېد.
خبریال: عبدالولي عابد
عکاس: سید امید سادات