وروستی
ملت ته د دولت راپور ورکولو په برنامه کې د چاپېریال ساتنې ملي ادارې ملت خپل راپور وړاندې کړ
د کب ۱۴مه ـ کابل
لومړۍ برخه:
ملت ته د راپور ورکولو برنامې په لړ کې نن چهارشنبه د کب په ۱۴مه نېټه د چاپېریال ساتنې ملي ادارې مشرتابه پلاوي د دې ادارې د ۱۳۹۸ کال د لاسته راوړنو او فعالیتونو په هکله ملت ته خپل راپور وړاندې کړ.
دغه کنفرانس چې د حکومت د اطلاعاتو او رسنیو په مرکز کې جوړ شوی و، په پیل کې د چاپېریال ساتنې ملي ادارې عمومي رئیس شاه زمان میوندي په عمومي توګه د دې ادارې د مهمو او سترو لاسته راوړنو او فعالیتونو په هکله وینا وکړه.
ښاغلي میوندي د دې ادارې د مختلفو برخو فعالیتونو (بنسټ جوړونې، د الکترونیکي سیستمونو پیاوړتیا، اداري چارو چټکتیا، پالیسۍ او پلانګذارۍ، د راتلونکي لپاره د ملي برنامو او ننګونو) ته اشاره وکړه او ویې ویل چې د چاپېریالي ننګونو د مدیریت لپاره یې په ځانګړي ډول د هوا ککړتیا راکمولو په موخه د چاپېریال ساتنې ملي ادارې، په ۱۳۹۸ کال کې مشخص او واضح اقدامات ترسره کړي دي.
نوموړي وویل: د هېواد د طبيعي ښکلاوو د ساتنې په موخه مو بامیان پلاټو او د شاه فولادي طبيعي منظرې د ساتل شویو سیمو په توګه اعلان کړي دي او د کندز ولایت د امام صاحب ولسوالۍ، د تخار درقد، د غزنې ناهور دښته او د نورستان ولایت د ساتل شویو سیمو او ملي پارک په توګه د اعلانولو لپاره چمتووالي بشپړ شوی دی.
د چاپېریال ساتنې ملي ادارې عمومي رئیس وویل: د چاپېریالي جوازونو د توزیع کولو په سیسټم کې اسانتیا رامنځته شوې او په یوه وروستي کال کې له ۸۳۰ پروژو څخه زیاتو ته د چاپېریالي تدابیرونو د نیولو په موخه جوازونه ورکړل شوي دي.
ښاغلي میوندي زیاته کړه: د ښځو د ګډون زیاتوالی، له ۹۰ سلنه څخه زیات د دې ادارې د عادي او پراختیایي بودیجې مصرفول، د چاپېریالي معلوماتو ملي سیسټم جوړول، د چاپېریالي چارو متخصصینو شبکې جوړول، له اقلیمي بدلون سره د مبارزې په موخه د نړیوالو مرستو جذبول، نړیوالو کنوانسیونونو ته راپور ورکول د عامه پوهاوي په برخه کې د برنامو زیاتوالی یې په ۱۳۹۸ کال کې د دې ادارې د مهمو لاسته راوړنو په توګه یاد کړل.
د چاپېریال ساتنې ملي ادارې عمومي رئیس د دې ادارې وروستیو پلانونو ته اشاره وکړه او ویې ویل: په ۱۳۹۹ کال کې به په ملي کچه به د همغږۍ د پیاوړتیا په موخه د چاپېریال چارو ملي مشورتي شورا جوړه شي او له اقلیمي بدلون سره د سازښت په برخه کې به د نړیوالو مرستو د جذبولو لپاره اغېزمنې برنامې جوړې شي.
د چاپېریال ساتنې ملي ادارې عمومي رئیس وویل چې د بودیجې کموالی، د ادارو ترمنځ د لازمې همغږۍ نشتون او د عامه پوهاوي کچې ټېټوالی یې په ۱۳۹۹ کال کې مهم ګواښونه دي چې دا اداره ورسره مخ ده.